劉浩龍搣甩34磅靠乜？　搵張家輝健身教練Michael瘋狂操肌

幾時都話肥仔係潛力股，啱啱舉行完演唱會嘅劉浩龍﹝師兄﹞喺Facebook上載咗一條短片，片中師兄將自己1月減肥前嘅相公開，笑言畀咗呢張相好多朋友睇，佢地都話做咩key自己個樣落肥仔度：「真係冇呃大家，由2018年1月27日開始為演唱會進行3個月嘅減肥計畫，買咗飛嘅觀眾好抵，可以睇到我出動晒晒屋企所有唔同顏色嘅孖煙通。」片入面真係見到師兄個肚腩變做腹肌！師兄就表示自己總共減咗34磅，如果580蚊一張飛，除34，即係1磅只係17蚊港幣，並感謝大家支持肥龍去減肥。之後，佢仲抵死化身為「肥龍美容」做美容代言人，而查詢電話就係自己嘅歌94340634。

其實師兄之前都講過為演唱會進行地獄式減肥，所以喺開始減肥前大食一餐先上路，而今次師兄就搵到張家輝拍攝《激戰》時嘅健身教練Michael瘋狂操肌。自言節制能力好高嘅師兄就話其實減肥都唔算太辛苦，只要落啲心機整都可以好好味！