【逆緣】糖妹甲組腳唔見咗 分享跑步瘦腳心得：唔食早餐空肚跑步
糖妹黃山怡於《逆緣》中飾演的Macy蔡明詩一角，活潑可愛而且敢愛敢恨，相當討觀眾歡心，而且比起以往的「甲組腳」，劇集中經常短裙仔現身的她，雙腿明顯纖瘦了很多。當然，仍有些網民嫌粗，但別忘記拍攝時間已是2017的事，現在的糖妹雙腳比之《逆緣》中的Macy更幼細，她亦回覆《香港01》說：「今年係瘦得最多最快嘅一年。」
【跑得有法！唔節食一樣得】
對於有觀眾指糖妹雙腳較以往幼細了，糖妹顯得很興奮：「大家終於留意到喇！跑步係有用架。」單單跑步就能將「蘿蔔腳」變「筷子腳」？相信這是很多女士都想知道的事，因此糖妹很樂意公開她的瘦腳方法：「一有時間我就跑，朝早起身未食早餐就去跑，唔使怕空肚跑步會暈嗰啲，因為咁先可以真正消耗到你本身嘅熱量同脂肪。如果你食完早餐先跑，咁你消耗嘅只係啱啱吸收咗嘅早餐，呢個係我睇書睇返嚟，覺得係幾適合我嘅方法囉。」
跑，不是換件衫著對鞋，落到街或者找部跑步機就隨意跑，糖妹更指要跑得有法：「我每次跑一般都係維持30至40分鐘左右，如果選擇跑步機，我就會一分鐘快步行，然後一分鐘極限喪跑，再一分鐘快步行咁輪替囉。同埋如果我今次跑步機選舉11呢個跑速，下次就選擇跑速12，再唔係就增加斜度，總之就逐步增加自己嘅難度，咁先可以keep住進步，跑街都一樣要自己調節速度。」
飲食方面呢？需要節食、吃得清淡嗎？「喺屋企嘅話會稍為清啲啲囉，都係食下糙米同菜咁樣，不過大家都知我好鍾意食嘢，所以其他時候我係唔理照食，我係為食而做運動。」
【除咗瘦，線條同樣重要，但切忌急功近利】
運動方面除了跑步，其實糖妹更會不時健身，目的是想令全身的線條更好看！「重量唔重要，次數都係其次，最緊要做gym時動作正確，我以前就係唔識得收腹，所以出嚟效果麻麻，又搞到膝頭、小腿受壓。而家我識得收腹就好好多，特別係今年瘦得最快，因為經過多年運動以及調整，我終於搵到最適合自己嘅方法。同埋呢，做gym可以清楚分返開臀部同腿部嘅線條，即係唔會臀部同腿部融合成一嚿嘢，咁樣唔好睇，咁當然我都仲係有待改善啦。」
最後，糖妹建議大家有心減，一定要慢慢嚟唔好急，因為佢自己經過「甲組腳」洗禮後，都用咗好多年先有今日嘅「成績」，而自動自覺去搵教練協助就更加係呢兩年嘅事，皆因：「曾經有人同我講，一日有1440分鐘，點解你唔肯花短短40分鐘喺自己身上投資自己呢？於是我『叮』一聲，又係喎！」各位兄弟姊妹們，大家又聽到「叮」一聲未呢？
【逆緣】陳山聰辣手摧殘糖妹 賈綽真心愛Macy：為批金衝昏頭腦