姚子羚習慣單身狀態　公開擇偶條件：鍾情成熟型男性

姚子羚今日（26日）與麥明詩同場出席內衣品牌活動，子羚接受訪問時自稱好耐冇見，因為她近兩個月都喺橫店拍攝新劇《包青天》，工作完又要飛番橫店繼續拍攝，認真辛苦！

為咗《包青天》子羚更要去到新疆拍攝，當地天氣熱溫差又大，對皮膚好大影響，子羚話：「已經有心理準備，但聽講新疆嘅星星好靚，所以都好期待同胡定欣一齊睇星星，同埋好少機會去沙漠，所以準備咗相機叫胡定欣幫我影靚相。」

回復單身的子羚係咪已經習慣呢？子羚：「都ok嘅，始終同佢都係和平分手，同埋大家一直保持友好關係，有保持聯絡，我有啲事要佢幫我處理，都有需要佢幫忙嘅時候，所以我地大家關係都ok嘅。」子羚仲話：「自己不嬲鍾意成熟型嘅男性，但暫時未有人接近我，因為我喺橫店開工，日日對住嘅男人係曹永廉、張振朗同張國強，仲有胡定欣囉，所以都冇時間諗呢樣野。」