謝霆鋒送8,500萬豪宅俾謝賢　未夠一年原價轉名係慳稅秘招？

搵到錢買磚頭可以話係香港人理財定律，特別喺香港個個都以上車為目標，近年政府為咗減少炒賣推出唔少辣招，買樓要俾印花稅，手上唔止一個物業又話要俾多15%，計落條數相當襟計。去年傳出謝霆鋒豪擲8,500萬，買入淺水灣豪宅送俾爸爸謝賢，不足一年就被發現棟樓變返霆鋒名下，咁就慳咗超過500萬稅款，可以買多層樓啦。

上年5月傳出霆鋒一擲千金，以8500萬購入淺水灣豪宅怡峰（The Somerset）送俾爸爸謝賢，呢個低層A室單位，實用面積1,939呎，呎價達4.3萬元，擁有深水灣及淺水灣雙邊海景，外間大讚霆鋒真係好孝順。估唔到不足一年豪宅已經易主，新主人竟然係霆鋒﹗根據土地註冊處資料顯示，怡峰低層A室，去年5月中以8,500萬港元成交，由謝家鈺（謝賢原名）持有，到今年4月初，該單位的登記買家已改為謝霆鋒（TSE NICHOLAS）。大家都好奇點解四哥原價會賣樓俾個仔呢？

原來呢個做法叫做直系親屬轉讓，係近年唔少人買樓慳錢嘅做法。2013年政府推出雙倍印花稅，擁有本地住宅的本港居民，購入另一所本地住宅時需繳付雙倍印花稅，假如是直系親屬轉讓住宅物業，可以豁免額外印花稅、雙倍印花稅及買家印花稅，但仍要按一定規則繳付舊印花稅。霆鋒手上有唔少工商舖位及住宅，如果上年佢自行買入單位，就要俾15%近1300萬，而家由四哥轉讓俾佢，上年同今年兩次交易稅款加埋七百幾萬，咁就慳咗五百五十幾萬啦。