【有片】張家輝嬲爆要網民找數 ：說過渣渣輝的人都要回票給我！

要數今年張家輝最紅嘅作品，唔係電影，而係「渣渣輝」廣告。張家輝喺內地代言網絡遊戲，廣告中一句：「大家好，我是渣渣輝...」被瘋傳，最近佢為自導自演作品《低壓槽》，穿州過省到處宣傳，無可避免要用國語溝通。家輝俾人笑得多睇嚟已經豁出去，呢日喺網上直播中侃侃而談，笑住警告觀眾：「叫過我渣渣輝啦，那這次的電影呢也是時候掏錢啦，不要忘本啊。」

為咗宣傳自己嘅作品，藝人經常要車輪式接受訪問，好似張家輝呢日就喺一個網站直播，親自回答主持人以及網友嘅問題。整個直播長約個半鐘，家輝真係好落力去宣傳，不過要聽得明佢講乜，都真係要相當專心，因為佢嘅港式普通話相當有個人風格，無字幕之下，其實都真係好好笑。有觀眾留言表示，想睇張家輝直播玩「渣渣輝」遊戲，張家輝亦顯得好豁達，豁出去笑住警告觀眾：「你們都叫過我渣渣輝啦，那這次的電影呢也是時候掏錢啦，不要忘本啊。」對比直播前拍攝嘅預告片，被網友笑稱：「望住稿照讀，講嘢個表情好似被迫認罪咁。」直播中嘅普通話，都唔算太差啫。

【有片】張家輝內地廣告爆紅 世界級國語同古天樂有得揮？

公道啲講句，張家輝啲普通話已經進步咗好多啦，事關有網友搵返當年佢喺第26屆香港電影金像獎主持嘅片段，家輝走落台訪問周杰倫，講咗句：「周總你好」之後，就陷入一片安靜，最終周杰倫講咗句：「你講廣東話就好﹗」由此可見當年家輝連一句完整句子都講唔出，而家可以做1.5小時直播不停講，真係大躍進架啦。