【黃子華棟篤笑開賣】網上購票細則要睇清楚 撳爛F5原來係冇用
撰文：洪曉璇
出版：更新：
今日係黃子華棟篤笑《金盆𠺘口》開賣日，各區出現長長人龍冒雨排隊，希望靠自己嘅汗水同毅力買到門票入場。但邊有可能個個請到假瞓街買飛呀，唔使搵食咩？其實仲有個戰線，就係上網買啦，好多人話準備定多個Keyboard，撳爛個F5按鈕誓要買到為止，不過，大家知唔知，F5唔係咁用架。
【黃子華金盆𠺘口開賣】400人尖沙咀通利撲飛 南亞人霸頭30個位
今朝要返工嘅朋友，發唔發覺左右隔離同事都默默地搶票中？當不停聽到類似打機嘅聲音時望一望，咦，佢撳極都係F5嘅，唔怪得買唔到啦。事關買票都要睇清楚條文，當你未入到購票頁面，應該會見到呢個版面：
第一段寫得好清楚：「系統現正為大量顧客處理網上購票，所有網上購票連結正由其他顧客使用中，請按以下「再次登入」按鈕再嘗試登入。」睇唔清楚？仲有特別寫多次：「請注意：使用鍵盤上的「F5」按鍵不能連結購票網站。」所以話，如果不停聽到同事連續按F5，而又一直未買到門票，大家可以考慮話聲佢知，今朝撳呢幾千下係徒勞無功架。