《黃金花》毛舜筠日本遇驚喜派對　凌文龍挑戰做歌手出碟？

毛舜筠及凌文龍憑電影《黃金花》喺金像獎上奪得理想成績，而今晚（２３日）各投資方及演員就舉辦慶功宴。圈中一眾好友都有到場祝賀，包括：余安安、江欣燕、黃百鳴等。影后毛舜筠都剛由日本旅遊回港，毛舜筠表示：「仲開心興奮㗎，不過冇啱啱嘅時候咁興奮，喺日本都估唔到一班好朋友會俾咗一個驚喜我，因為余安安咁啱又喺日本，佢又叫埋苗僑偉夫婦及吳啟華等人俾咗一個surprise派對，開心咗一輪。」

至於凌文龍奪得新人獎心情都一直好興奮，不過佢就透露：「其實好大型慶祝活動暫時未有，都有同朋有食下飯。」對於奪獎後身價暴升，文龍就回答：「冇冇冇，我哋唔係諗身價呢樣野，只要接到好劇本，當然要演好角色。」凌文龍除咗演戲方面好之外，其實佢唱歌都了得，據契媽余安安稱可以下一步嘗試挑戰做歌手，文龍就有少少怕醜答：「佢過獎啦，因為早前有一個音樂劇輪選，所以自己就特意去練歌啦。」