【刑事偵緝檔案】郭可盈出招趕絕小三　大婆宣示主權係最有效方法

無綫深宵時段重播的《刑事偵緝檔案II》，睇大勇、義仔查案之外，觀眾更關心的無疑是大勇及Jessie的感情生活，尤其是近日劇情發展，講到新加入的警花藍嘉文，暗戀上司大勇，此舉當然觸動到Jessie神經，要千方百計趕走小三。其實男友跟女同事曖昧，可說是不少女士心中的刺，正好跟劇中的Jessie學返幾招，防止男友被小三搶走。

《刑偵II》之所以被譽為神劇，當中查案的內容固然夠晒吸引，緊張刺激，但除了推理案情之外，大勇的感情生活，更是劇迷關心的焦點，尤其是嘉文加入後，擺明車馬對大勇有意思，成日露出小妹妹仰慕大哥哥的神情，對於大勇來說，當然相當受落，就算沒有什麼非份之想，也樂於有人鍾意自己，可謂男人的通病，劇中的Jessie無可避免睇到眼火爆，要諗計趕走情敵。

貼地劇情正好讓大家學吓Jessie如何出招，首先女人最忌潑婦罵街，Jessie雖然嬲到震但仍然要故作大方，跟情敵和平相處，但有意無意之間在情敵前，跟大勇卿卿我我，大晒恩愛，宣示主權，仲要不時問對方的愛情睇法，講到尾都是想直接出招，用心理戰去打擊情敵，女人出手真係殺人不見血。

相關文章：

【刑事偵緝檔案】每次兇手都要解釋案情　無綫係咪質疑觀眾智商？​

【刑事偵緝檔案】大勇被煩膠未來岳母語言欺凌　娶人個女惟有死忍

若然絲打的另一半，在公司遇上進取的小三，既然有心撬牆腳，加上有地利優勢，絲打分分鐘會處於捱打狀態，講真小三質素未必及得上自己，但勝在有新鮮感，就算男人不會跟她做人世，發展霧水情緣相信很多男人不會介意。劇中的Jessie，要趕走情敵殊不容易，這個時候就要睇緊大勇，改向男人出招，雖然Jessie大呷乾醋，但對住大勇表現卻是十分得體，不會過分緊張，亦不會太過放任，而大勇就仿如變成一隻風箏，只要Jessie收線，他仍會返回身邊，最終小三只是過眼雲煙。