「招積」張建聲網上宣佈與陳嘉莉分手　原因係自己事業心太重

張建聲憑網劇《反黑》角色「招積」彈起，之後又接拍新戲《真‧三國無雙》飾演「張飛」，可以話真係愈來愈紅。感情方面，佢上年五月就承認同同公司藝人陳嘉莉（Kelly）拍拖，之前男方為黃子華主演嘅賀歲片《棟篤特工》宣傳時，仲孖住女朋友亮相，非常恩愛。點知張建聲剛剛就喺網上宣佈自己已經同Kelly分手一段時間：「跟大家說一聲，我們已經分開了一段時間，原因是我太事業心重而忽略了身邊人，從而少了溝通多了吵架，而兩個人相處所產生的問題亦不是一朝一夕的事，中間的離合數次都令我們成長不少，經過認真的考慮，我們決定先放手，各自專注於工作上。」

張建聲非常感慨，字裡行間流露咗對呢段感情嘅惋惜：「如果時間能許可令我們遲一些遇上，我相信結果肯定不一樣，Kelly，感謝你給我這兩年喜與悲的回憶，亦多謝你的照顧、體諒和付出，希望無論在哪方面你都能幸福快樂，開開心心，感恩❤，多謝你⋯將來的事，就交給上天安排吧。」好多網友都留言安慰張建聲，望見佢同Kelly嘅合照亦感同身受咁。