【逆緣】黎耀祥北上發展看透局勢：所有頒獎禮都係宣傳活動
《逆緣》作為黎耀祥暫別TVB的劇集，一出街的收視已經達到「視帝」的水準，第一集高開接近29點，是2018年上映劇集最高的一套。而黎耀祥率領三爺孫組合姜大衛和陳家樂，在劇中恰如其分的搞笑絕對應記一功。很多人都慨嘆，TVB好戲之人都陸陸續續北上尋真銀，男的除了祥仔外，吳卓羲、黃宗澤這些當紅小生，甚至近來的陳豪、郭晉安這些視帝都已經慢慢離開香港觀眾視線，無不可惜。
早前在《逆緣》的宣傳活動上，祥仔接受《香港01》訪問時表示，自己立即就要動身北上工作，他說：「上橫店開工，都計劃咗好耐喇，拍兩到三個月左右。（今次同TVB最後合作？）其實都唔係嘅，我都係簽TVB，不過合作模式變咗，我一直都唔係簽經理人合約，而家就係簽部頭喇。」
53歲的祥仔，由1986年便加入TVB，第一部劇集叫《綠卡何價》，相信除了資深的電視迷，應該沒有人會有印象。在這漫漫長路當中，他曾經試過出走到亞視，亦試過挑戰影壇，但在2002年始終發現娘家的好，重返TVB。自此他的事業便一帆風順，先在《楚漢驕雄》中飾演韓信打響頭炮，然後基本上每年一部大劇都大獲好評。在2009年更迎來自己事業的高峯，一句「人生有幾多個十年」打遍香港無敵手，以大熱姿態憑《巾幗梟雄》柴九一角首奪視帝。之後的事相信大家都很清楚，在2010和2012再奪視帝，成為跟羅家良和郭晉安一樣三奪視帝的重量級人馬。
祥仔演的劇集多不勝數，連他自己都說如果計埋少戲份的角色，100部是一定超過的。其實當中哪五部是他最深刻呢？他表示：「其實好多嘅，我好多都鍾意，《巾幗梟雄之義海豪情》、《巾幗梟雄》、《秀才愛上兵》、《情陷特區》同《西遊記》，《樂壇插班生》都鍾意，咁多年真係好多。如果要揀一個我最鍾意《巾幗梟雄之義海豪情》，因為我鍾意個年代同背景，日本侵華，同嗰種中國人嘅人情味。柴九當然係好成功，成功在於係個角色嘅成長，唔係個個戲嘅角色都可以寫得咁全面，小人物奮鬥史好多人都鍾意。」
講起小人物，在《逆緣》當中，祥仔正正就是飾演這種角色，十分多網民都回想起當年的祥仔，令他們重拾舊時的感覺，無一不讚好。「小人物角色嘛，其實我無乜感覺，因為我做好多小人物，唔難演。今次都知觀眾鍾意我做呢種角色，大家開心就好喇。其實我無所謂，咁多年經驗其實我做乜都唔係好難。」的確，無論英雄抑或小人物，在祥仔的演藝生涯已經出現過無數次，但原來最好的刀並不會有生銹的一日，至少祥仔沒有。
最後，離開TVB有一個慣例，就是基本上頒獎禮注定食白果，不過祥仔卻不以為然，他說：「如果頒獎禮有份我緊係要去喇，因為呢個係一個遊戲嚟㗎嘛，一個尊重，你喺呢個圈，呢個圈嘅遊戲、制度，你梗要去喇。就算你唔攞，你都要去支持㗎喇，我覺得。其實幾樣嘢喇，所謂嘅遊戲，輸贏已經係一個遊戲喇。其次亦都係一個宣傳活動，所有呢啲頒獎禮都係一啲行業嘅宣傳活動，當你有呢樣嘢嘅時候，自然會引起人嘅注意、關注，呢個咁樣嘅活動係對無論收視又好，演員嘅推廣又好，都係有幫助。」