黃聖依媽媽上節目曬英文　安迪面試講唔出最快樂的事

黃聖依同囝囝楊安迪參加內地親子真人騷《媽媽是超人3》，引起唔少話題，早前安迪嘅嫲嫲公開佢嘅九萬呎世界級豪宅，令大家嘩然；今次輪到外婆登場，上次嫲嫲炫富，今次到外婆在節目上大晒英文。

黃聖依出生於上海一個傳統知識分子家庭，媽媽鄧傳理係《新民晚報》編輯，父親黃自強係大學講師。第三期講到安迪到上海參加面試，黃聖依順道帶佢去探外婆。外婆煮好一頓飯畀聖依同孫仔，安迪本來津津有味咁品嚐美食，但可能外婆太耐無見安迪，一見面就捉住佢講面試答題技巧，仲同黃聖依車輪戰咁輪流考安迪英文同數學，睇得出外婆英文基礎不錯，果然係書香世家。

安迪初頭都有回答應付媽媽同外婆，但到最後佢忍唔住開始敷衍作答，甚至胡亂講嘢作出反抗。對於黃聖依同外婆嗁教育方式，網友出現兩極嘅反應，有人就覺不過安迪好可憐，食餐飯都要畀家長不停考試；另外就有人話家長呢種隨時隨地給孩子上課嘅方式好好，可以鞏固小朋友嘅知識，或許細路仔呢刻唔鐘意，但大個之後會感激父母。

黃聖依同外婆嘅教育方式好唔好我哋無資格評論，不過孩子真係好需要大人嘅關懷。呢集最令人心酸嘅係，安迪面試時，老師叫佢分享一件最快樂嘅事，安迪一臉茫然，完全講唔出。老師認為安迪不是特別能表達自己嘅情感，呢個情需要父母多些陪伴，同佢有多啲日常交流。安迪自細跟著嫲嫲長大，缺乏同父母相處嘅時間，形成佢沉默內歛嘅性格，令人心疼。