薛家燕豪擲四千萬娶新抱　送40萬龍鳳鈪大過拳頭

薛家燕囝囝石耀庭(Jackson)將於6月迎娶女友Zoe，家燕姐對準新抱Zoe寵愛有加，除咗過百萬嘅大禮，仲送市值二千萬嘅西半山豪宅畀佢哋兩公婆做新居，加上洲際擺酒，據講成個婚禮加埋要使四千萬。

家燕近年投資有道，手持七個物業，總市值過億元，同時佢亦懂得營商，繼2004年創立「家燕媽媽藝術中心」，早前斥資七位數字推出自家製的「家燕媽媽曲奇」，可謂豬籠入水，係圈中富婆。所以家燕娶新抱，出手一定唔會手軟，早前佢仲拉埋新抱Zoe一齊去睇金器，睇中兩對巨型，加埋差不多30兩，盛惠40萬。

日前Zoe在IG上載過大禮嘅相，未來老公Jackson，家燕姐都有親自出馬。只見全部過大禮嘅禮盒放滿鋼琴同飯枱，包括名貴海味、嫁女餅、利是、果籃，巨型龍鳳鈪、金豬牌頸鏈、名錶、其他金器，對龍鳳鈪仲大過拳頭。另外仲有一大排巨型金豬牌，約有六大隻，保守估計加埋近十兩，以現時金價約1.4萬一兩計，約值14萬。尋常人家過大禮一般可能都只係幾千至幾萬蚊，但家燕姐送嘅金器大禮加埋總值過百萬。見到未來奶奶送咁多隻金豬畀自己，Zoe都忍唔住話： ‘I think all those golden piggies are hinting something.”　無估錯喇，家燕姐擺明想早日抱孫啦。

家燕姐一向係圈中出名嘅工作狂。早年婚姻失敗，一度尋死，但諗起三個仔女，佢咬緊牙關生存落去，此後就展開佢無間斷嘅工作，日以繼夜咁拍劇，做空中飛人飛來飛去登台，同時亦涉足商界，管理佢嘅藝術中心同曲奇餅店。一個女人仔湊大三個兒女，咁博命打拼都係為咗佢哋。家燕姐見到仔女幸福，佢就幸福，所以使幾多錢對家燕姐嚟講唔重要，最重要係見到仔女開心。依家囝囝娶新抱，家燕姐等於多咗個女，當然要愛鍚佢啦。各位準新抱，羨慕吧！