【果欄中的江湖大嫂】江嘉敏馮盈盈喊戲勁感人　網民讚睇到心酸

日前播出的無綫劇集《果欄中的江湖大嫂》有兩場戲睇到一班觀眾同網民好心悒，就是講勇哥 (黃嘉樂飾) 為了救女友黃友美 (江嘉敏飾) 而遭Kent (李天翔飾) 用石頭襲擊後腦，最後傷重致死。當友美攬住垂死的勇哥並聽勇哥遺言時，已經哭成淚人。江嘉敏亦演得非常入戲，呢場喊戲完全表達到她悲慟的心情，除了豆大的眼淚，仲喊到連鼻水都流埋，但卻一點也不浮誇，情感流露得好真摯感人，難怪不少網民都話睇到好心酸，甚至眼濕濕。之後江嘉敏在家中邊彈鋼琴邊想起同勇哥的甜蜜片段，再次悲痛落淚，呢場內心戲亦充滿感染力。

而身為勇哥細妹的小狼女 (馮盈盈飾) 到殮房認屍一幕同樣令人看得心碎，她一臉神情呆滯令人感到更加沈重，當她一見到勇哥的屍體，難以接受到阿哥經已離世，眼淚開始缺堤，哀傷的情緒逐漸崩潰，連說話的聲音都變得好高音，明顯是真係喊住咁講出來，完全演繹到失去唯一親人那種肝腸寸斷的傷痛。網民又再次睇到鼻酸。以馮盈盈首次拍劇來說，呢場戲演得相當唔錯。