49歲張可頤Keep得好 太dry想拍拖：冇理由求其揾個
撰文：賴家杰
出版：更新：
藝人張可頤今日出席自己代言嘅美容廣告發佈會，廣告當中主角Maggie造型百變，原來今次佢除咗做主角，仲係美術指導，Maggie坦言今次係一個大膽嘗試：「其實今次自己都有嘗試負責呢方面嘅事情，包括造型、概念等都有幫手諗，咁都好多謝身邊嘅同事幫我分擔咗好多。」同時今次呢個作品面世，Maggie見到都好開心覺得好靚。但講到長遠會唔會做美術指導，Maggie就話想一步一步慢慢黎。
好多人會覺得靚女一定會斯文，好靜態嘅感覺，但Maggie就有另一種睇法，因為廣告中有一個造型就係Rock and Roll，Maggie透露最鐘意呢個造型：「好多人成日將靚女嗰個框框限死咗好斯文，但我覺得靚女應該係唔同職業唔同嗜好嘅女仔都可以係，所以個嗰一日見到支電結他就靈機一觸，因為Rock and Roll比人感覺好有個人風格。」
現今社會嚟講，微調已經變左一件好普通嘅事，而好多藝人都大方承認有做微調，至於對Maggie嚟講微調呢件事係接受，佢本人就冇話抗拒呢件事情，但若果身邊有女性朋友要做嘅時候自己會首先介紹佢地用自然療法，當然如果佢地做完微調覺得會令到自信增加，自己會以得安全為準。
上個月尾係張可頤49歲嘅生日，一直都係「工作狂」嘅佢，工作更未停過，呢輪忙完電影宣傳，接落黎又要飛美國拍電，對於愛情會唔會都係今年生日願望之一？Maggie就表明：「男朋友幾時都想搵，但冇理由想搵男朋友就求其搵個男朋友，我覺得大家要夾到，緣份喺到。」