唐詩詠契哥一籮籮　認契哥係曲線收兵？　

前幾日林子善結婚補擺酒，筵請63圍都唔夠放晒佢啲朋友，幾乎成個電視城嘅人都嚟參加飲宴，仲墟冚多星過台慶頒獎禮。當中林子善嘅兄弟團相當養眼，有鄭嘉穎、馬國明、黃長興、袁偉豪等等，子善話接新娘嗰時，姊妹個個都掛住望靚仔，所以幾乎係直行直過冇遇到咩困難。除咗一班型男之外，唐詩詠仲反串著上西裝做兄弟，企喺成班男人之中好搶眼，詩詠仲好感性咁喺IG度祝福子善要永遠幸福快樂，仲Hashtag「#鐵馬兄弟」，咦，乜佢哋係兄弟？

係呀，冇講錯，兄弟團入面係《鐵馬尋橋》嘅班底，包括鄭嘉穎、馬國明同黃嘉樂，佢哋3個都係唐詩詠嘅契哥，仲加埋主人家林子善，總共係4個契哥，呢件事真係相當尷尬。事關之前馬國明同唐詩詠因合拍《梟雄》日對夜對之後，傳緋聞傳得好勁，兩個人都好曖昧咁冇否認，只係叫大家畀啲空間佢，唔知仲以為真係拍緊拖，到最後佢同洪永城一齊先知原來係流料，唔通天下嘅契哥契妹都係「朋友以上，戀人未滿」？有人就話認契哥係曲線收兵嘅一種，咁係大家葡萄啫，馬明本身已經係個個人心目中嘅100分男神，仲要加埋218五個零嘅鄭嘉穎、黃嘉樂同洪爺林子善，簡直係每個女仔嘅夢想生活，淨係諗吓都不得了！

如果話認契哥係收兵，咁就太傻太天真喇，以唐詩詠嘅條件真係唔需要啦，話晒都係視后又識得撒嬌。不過咁，上契就唔係女仔嘅專利，好似馬浚偉咁，佢仲早過唐詩詠認契妹，唔通又話佢追唔到人哋就認做契妹咩？好似大台當家花旦楊怡、陳法拉、鍾嘉欣都係馬浚偉經常公開承認的「大妹」、「二妹」、「三妹」，佢哋3個嘅級數都不分上下，可以擁有呢3大美人做契妹，真係夫復何求！馬仔仲有句名言：「男女唔一定拍拖，契哥契妹唔一定有嘢。」估唔到平時聽小學生話要招FD子，招家人，原來現實生活中娛樂圈都仲好流行呢樣嘢。