Angelababy睇時裝Show都俾人鬧？　疑合照Cut走景甜惹圍攻

上海時裝周於三月底至四月初舉行，好多亞洲藝人都有飛去上海出席，日前已經圓滿落幕，但係有內地微博自媒體博主依然拿時裝周來大造文章，引起唔少爭議，而今次的話題主角係Angelabay(楊穎)同景甜。

Angelababy同景甜早前分別受邀出席Dior個Fashion Show，同場有劉嘉玲同水原希子等。該位博主分別從Angelababy同景甜嘅微博，抽出佢哋去Dior Show嗰組相嚟發酵話題。該名博主寫道：「baby微博發文卻裁剪掉了景甜，只剩一個手臂。而在景甜的微博裡，唯一一張合照，卻有baby。」此文一出，唔少網民留言大罵Angelabay黑心、壞心眼、人品差，要幾難聽有幾難聽。幸好都有些網民心水清，鬧博主無風起浪，無事生非，捕風捉影，小題大造。

睇返Angelababy同景甜上載的照片，兩人都有各自放出一張係佢哋坐喺度睇Show嘅相，兩人中間隔咗陳凱歌次子陳飛宇，Angelababy係打直影的，剛好無影到景甜，只影到佢嘅手臂，而劉嘉玲就有出現在該張相中；而景甜嗰張，就係打橫影的，景甜在正中，剛好影埋baby。其實一切都只是剛好，從呢兩組圖片看來，只能說兩人沒有深交，但談不上係Angelababy故意要將景甜從相片上Cut走，被人咁樣拎出嚟造文章，baby都算冤枉。