【開心速遞】阮政峰林凱恩真係拍拖？　男友護愛苗：佢係好女仔　

無綫處境劇《愛‧回家之開心速遞》入面有好多對CP，唔止男女仲有男男，睇得大家好開心，當然這些只係拍劇效果。不過都有幾對疑幻似真，觀眾同網民亦不時估他們到底會否戲假情真，例如池子孝 (阮政峰飾) 同紅衫魚 (蘇韻姿飾) 呢對，以及金城安 (周嘉洛飾) 同Bonnie (林凱恩飾) 呢對喇。而他們的IG也有大量同劇中另一半的合照，真係好Sweet㗎。近日就有報道指阮政峰 (Hero) 同蘇韻姿其實只是煙幕，周嘉洛同林凱恩 (Iris) 亦非一對，真正拍拖的原來是Hero同Iris。

既然有呢個傳聞，梗係要問下兩位當事人啦，問到Hero是否正跟Iris拍拖，他答得好小心翼翼咁話：「呢個問題就要問佢 (Iris) 喇，問佢啦，要睇下佢點樣，我唔可以作準嘅。」非常之保護Iris喎。雖然他沒有親口承認拍拖，但就坦言Iris是他喜歡的類型，是理想女朋友，Hero表示：「佢係好女仔嚟，我哋識好耐，想要多啲時間了解下大家。(發展緊？) 喺唔影響對方工作嘅前題下，咁我哋各自有任務，要唔影響到劇組同拍攝。」

他謂兩人好少單獨約會，多是成班朋友一起聚會，因他們都好鍾意熱鬧，又強調現階段要為事業拼搏，想做到成績先：「我份人好難一心二用，所以想有事業先，而且拍拖係為長遠目標，都想有能力照顧另一半。」

而Iris聽到Hero這樣回應，就甜笑表示：「了解下先啦，有無發展機會好難講，我哋不嬲成班朋友一齊玩，周圍去影相，咁我哋都好傾得埋，再熟落下先啦。」她笑言如果兩人單獨約會會好尷尬，又與Hero口徑一致話好鍾意熱鬧，兩個果然好夾呀。仲有一樣好夾的就是Iris同樣說要以事業為先：「成班一齊都好開心，唔係淨係拍拖先開心，暫時唔諗拍拖住，畀空間我哋啦。」