【開心速遞】大小姐同送水輝終於有親密鏡頭　成功一吻定情？

無綫處境劇《愛·回家之開心速遞》入面咁多對CP，相信最得觀眾同網民喜愛的一定是大小姐（林淑敏飾）同送水輝 （許家傑飾）喇。呢Pair真係極有觀眾緣同極討好，有不少人甚至話睇呢套劇最開心就是睇到兩人的戲。今晚播出的第292集就係講他們兩個，呢集叫做「初戀無限feel」，未播出街已經令網民好期待，紛紛在討論區留言話呢集實會好好笑，因為昨晚播出的預告片段真係好搞笑，大小姐同送水輝仲有親密熱頭，而最重要是這些場面絕非大小姐幻想出來，是確確實實咁有身體接觸㗎。

預告入面見到大小姐同送水輝齊齊以學生look示人，大小姐着長衫戴眼鏡紮孖辮，純情得來又充滿喜感，送水輝就着白過牙膏的白恤衫，好有型，兩人仲重現電影《喜劇之王》一幕，送水輝情挑大小姐令她一臉含羞答答。除了玩制服誘惑加初戀感覺，大小姐還會着住婚紗等官仔骨骨的送水輝來搵她。兩人又手拖手踩roller，臨尾大小姐唔小心險些跌倒，好彩送水輝即刻使出一招英雄救美，一手捉實大小姐，另一隻手就摟實她條腰，大小姐即時被送水輝冧暈，瞇晒眼等送水輝錫錫。