《百變小櫻》主唱曾嘉莉去向成90後謎團　永遠嘅童年回憶個個識唱

早兩日入咗戲院睇《挑戰者一號》，裡面出現過嘅高達、大鐵人同埋時光機車DeLorean DMC-12等，真係Recall返起好多童年回憶。不過，對於身為九十後嘅大家嚟講，童年回憶又點止咁少，當中最深印象嘅可以話係無綫搞嘅《兒歌金曲頒獎典禮》。我諗當時好多學生對呢個大騷真係又愛又恨，因為佢裡面既有好多啷啷上口嘅兒歌，亦代表住又一個暑假嘅終結。係，冇錯，今日係兒童節，所以都想講一講兒歌呢樣嘢。

你最鍾意係邊首兒歌？係早年啲、陳松齡唱嘅《烏卒卒》？係鄭伊健為《數碼暴龍》動畫唱嘅《自動勝利》？抑或係「新少少」、林峯唱嘅《馴獸師之王》？我諗大家都有自己嘅答案。我能我嘅答案會比較另類，唔知一般男仔咁鍾意郭富城嘅《爆裂旋風》或者陳奕迅嘅《超人的主題曲》，我……我好鍾意曾嘉莉唱嘅《百變小櫻》，當年播嘅《百變小櫻Magic咭》我真係集集追。

或者大家已經唔記得咗曾嘉莉係邊個，但係都應該聽過呢句歌詞：「百變小櫻魔法神奇誰可阻擋，看我Sakura揮揮魔棒解開詛咒～」其實曾嘉莉真係當年真係幾犀利，首《百變小櫻》喺2000年時嘅《兒歌金曲頒獎典禮》拎咗「至Net兒歌大獎」。不過，佢嘅唱片公司華星唱片喺2001年時結束咗唱片部嘅運作，冇轉投其他唱片公司嘅佢亦從此喺樂壇裡面消失，而《百變小櫻》呢首歌亦變成佢唯一作品。

咁多年嚟好多人都搵緊佢嘅下落同去向，每隔一排都會有人喺討論區問曾嘉莉去咗邊，但每次問都冇人答得出，有關佢離開華星後嘅消息喺網上亦都係完全搵唔到，成為咗Google大神都解答唔到嘅千古謎題。曾經有人話曾嘉莉嫁咗人同去咗一間銀行嘅市場證券部工作，但係睇返嗰位「曾嘉莉」講股嘅片段，個樣又真係同曾嘉莉好唔同，所以好大機會只係同名同姓，換句話講，曾嘉莉真係變咗失蹤人口。雖然都知佢依家有新生活，但係點都係好想知佢嘅近況點，唔使佢再唱多次《百變小櫻》㗎，知佢過得開心就好夠。