【逆緣】陳家樂靚仔大隻十足彭于晏　入行15年網友稱一直睇漏眼

TVB劇集《逆緣》開播，已經引起唔少話題，當中以相隔十年再次效力無綫拍劇嘅陳家樂最多人討論。有網民於討論區開PO，指陳家樂「都幾正，幾靚仔仲幾結實!」，網民還指自己一直睇漏眼，大讚TVB今次搵陳家樂加盟係明智之舉。

陳家樂於《逆緣》中飾演飾演一個1940年代嘅人，名為鍾定國，與同為游擊隊成員嘅賈綽（陳山聰飾）經過急凍雪藏後在2018年被解凍並甦醒，係姜大衞嘅父親同黎耀祥嘅爺爺，面對兩個演藝界資深前輩，家樂的壓力不小呢！

話陳家樂靚仔，相信無乜人有異議，有網民仲話因為佢靚仔所以會追劇，果然有顏值有收視。但論演技，網民嘅反應就出現兩極。有支持者大讚家樂演技好，並話真心覺得佢他日有機會踏上視帝之路添；但亦有網民覺得家樂嘅演技強差人意，進步空間比較大。

由於家樂之前都係拍電影居多，雖然有喺HKTV同港台分別都有參與過唔少劇集演出，但畢竟唔夠入屋，令到網民覺得佢仲係新人，好似發現新大陸咁。其實家樂2003年參加歌唱比賽入行，至今已經15年，不過佢今年只係31歲，個樣又Keep到，難怪啲人覺得佢似新人嘅。