【任噏亂評】最邪惡港產cult片《山狗》 變態情節挑戰人類底線
講到香港Cult片，好多人都會第一時間諗起《山狗》同《打蛇》呢兩套80年代嘅電影，但對於比較年青嘅一代人，呢兩齣戲可以話係非常陌生。不過，就算隔咗幾多年都好，呢啲喺香港電影新浪潮時期嘅戲依然都係好劃時代，甚至比起好多依家嘅戲好睇得多。
早幾日，我阿頭當住我面放咗隻DVD喺我枱面，同我講叫我搵晚收咗工抽時間喺屋企睇咗佢。我拎起隻DVD睇，《山狗》？咩嚟？野生動物片呀？但睇清楚啲，就發現到DVD個封面設計得幾令人不安，除咗有幾個樣樣衰衰又面善嘅男人之外，仲有一個乸埋口面個樣勁慘嘅女仔，而封面亦都有兩行配字：「莊靜而──銀幕僅此一次的曝露」、「凶殘本性，獸心人面」。之後睇埋封底，原來套戲係鄭則仕、「大口青」王青有份做，咁都叫做有返啲平時見慣嘅人睇下，唔使個個都唔識。
封底個劇情簡介就咁寫嘅：「五名年青男女到郊外露營。眾人大意把玲獨自留下，逐被流氓輪姦，玲的哥哥為妹追兇，反遭殺害！玲受刺激而發瘋。警方無證據起訴疑犯，玲父悲憤莫名，逐用自己的方法為子復仇……」咁刺激？所以之後我就真係有少少興趣，仲上埋維基百科睇下相關資料打打底，原來呢套戲係喺1980年上畫，係新浪潮時期嘅余允抗導演拍，當時好多人都狠批呢套戲好冷血暴力，而女主角莊靜而雖然依家已經息影，但喺80、90年代好出名好紅咁，做佢阿哥嘅艾迪亦拎過金馬影帝，之後就慢慢了解到原來以前香港影業唔似依家好似就死就死咁，喺80、90年代真係好風光、好百花齊放，咩題材都有，亦拍得好夠薑。
其實大家只要google一下，都會見到網上有唔少關於《山狗》呢套戲嘅評論，但怕影響咗睇呢套戲嘅感受，所以都一一跳過唔睇。終於有一晚，小弟沖完涼沖定茶坐定定用咗個半鐘睇咗呢套戲，自問大膽、接受能力高，喺睇嘅時候真係有幾下淆一淆。當中最心寒嘅一定係「荷蘭佬」王青、「高佬」鄺佐輝、「蛇佬」關鑑銘、「矮腳虎」同齋睇唔做嘅「病甩毛」鄭則仕呢五隻「山狗」，喺山澗度輪姦「阿玲」莊靜而呢一幕。
呢幕一開始，「矮腳虎」笠住個牛頭骨喺水池彈出，嚇到剛剛洗完碗嘅莊靜而不斷尖叫兼逃走，而「矮腳虎」同鄺佐輝就好似馬騮跑跑跳跳咁邊叫囂邊追住佢，搞到莊靜而跣腳跌落水變落湯雞。帶隊嘅王青本身都話玩夠喇想拉隊走，點知見到莊靜而濕身透點勁性感，就忍唔住同班兄弟夾手夾腳撳低莊靜而，夾硬除佢衫除佢褲，而呢個鏡頭除咗有露毛場面，亦都有露點嘅特寫，但最深刻嘅始終都係莊靜而不斷掙扎嘅痛苦神情，至於歷劫後的莊靜而大字型軟攤喺山澗巨石嘅畫面，到艾迪抱住裸體嘅莊靜而不斷叫「阿妹、阿妹」都係好入心。
我覺得呢一幕真係好痴線，唔單只係意識上嘅痴線，仲係處理手法上勁得好痴線。畫面入腦不在話下，配樂都係令人緊張，喺山澗嘅場面中，導演同負責為電影配樂嘅泰迪羅賓就用咗低沉而密集嘅音樂製造一種煩躁感，同山澗急速而喧鬧嘅流水聲合二為一，令觀眾更加代入莊靜而嘅處境，用感受呢份自己處身喺大自然，自己一個人面對住猛獸嘅無助感。即使我係男性，同埋隔住個Mon，我都覺得成件事係好心寒。而導演同剪接師亦加插咗同一時間艾迪同鍾保羅喺營地裡熱血掘地，以及同行嘅一Pair小情侶喺田間風流快活，反襯出莊靜而經歷嘅恐怖。
其實呢套電影都有好多令人不寒而慄嘅畫面，但製造呢啲畫面嘅唔係嗰五隻「山狗」，而係飾演莊靜而老竇嘅陳星。經歷個女被姦、個仔被殺嘅陳星用咗啲唔係常人諗到嘅方法虐殺「山狗」，第一個死嘅人就係「矮腳虎」，陳星就喺森林度紮好個營引佢嚟，「矮腳虎」偷聞女人底褲後就諗住入營再強姦另一個女人，點知一踩入去個帳幕度隻腳就中咗捕獸器，之後陳星就趁機亂刀斬死佢。最令人震撼嘅係鄺佐輝嘅死法，陳星一早就整咗個類似血滴子嘅木箱，裡面有大量鐵釘，當鄺佐輝中伏被倒吊起時，陳星就拎咗個木箱出嚟放正喺鄺佐輝下面，然後就放繩等鄺佐輝兜頭直插落木箱，痛到佢不斷叫自己嘅同伴殺咗佢。
「蛇佬」關鑑銘嘅死法雖然唔特別，純粹係畀陳星赤手空掌打死，但係佢死後嘅畫面就真係好癲。故事嘅尾段，王青同鄭則仕發現到「蛇佬」條屍時，就見佢被倒吊喺橫樑上但條褲就好似郁郁下咁，王青就拉一拉「蛇佬」條褲，點知一大堆蛇同血跌哂落嚟，嚇到王青即刻腳軟坐咗喺樓梯。而最最最後，唔識游水嘅王青就畀陳星拉咗個水，鄭則仕放繩落水諗住救佢時，陳星就將條繩綁喺王青條頸度，鄭則仕用盡吃奶嘅食想拉王青上水，點知就係因為咁監生勒死咗王青。
雖然電影前面莊靜而、艾迪遊山玩水嘅畫面好似有啲冗長，套戲開始咗半個鐘先發生五隻「山狗」輪姦莊靜而呢件事，但係成套戲嚟講真係幾劃時代，就算以今時今日嘅角色嚟睇都唔會覺得Out，最起碼喺陳星為子復仇嘅部分係拍得相當清脆利落，依家好多電影都去唔到呢個水平。同埋，莊靜而嘅演技真係好犀利，除咗上面已經講過嘅佢被輪姦呢一幕，佢喺醫院裡面不斷刷牙刷到流牙血後，又用牙刷刷馬桶，再放落口係咁刷呢個畫面，可以話係有今生冇來世，佢帶住淚光嘅空洞眼神，完全係可能令到陳星之後近乎變態嘅行為合理化。其實講返起呢套戲，即使上映已經係38年前嘅事，但有份演出嘅鄭則仕依家回想起都話好深刻，有幾幕仲係永世難忘。