【丫鬟大聯盟】黃心穎拍劇捱到病狂嘔　返3日工凌晨4點先去急症

黃心穎今日拍攝《丫鬟大聯盟》的結局場面，不過她就表示自己的戲份尚餘2個星期工作。早前3月21日，黃心穎在Instagram貼出黑白自拍照，原來她早前身體抱恙。今日黃心穎接受《香港01》訪問時，仍然會有幾聲咳嗽。「我諗我病咗前後都有一個星期。都未試過拍攝期間病得咁嚴重，可能因為長期冇得瞓，抵抗力好低。」

黃心穎：「一開始以為係普通感冒發燒，點知拍拍下頂唔順，開始暈。跟住我就話可唔可以停一停，之後我就直情係叭咗喺地下。跟住我就嘔咗一晚，應該係啲菌入腸，第2日我就真係返唔到外景，之後就再返廠拍，拍完之後就發燒，第2日就失聲，跟住就覺得啲菌去埋隻眼度，因為隻眼開始變細。拍完之後，嗰一晚嘅凌晨4點鐘就終於去咗睇急症。」

真係聽黃心穎講都覺得辛苦。不過黃心穎就好「敬業樂業」，仲話個個人都係咁，帶病返工其實都係平常事。「因為之後仲有一套劇開，所以就一定要返廠，真係唔可以停。我真係日日都返工，所以呢一刻嘅我已經嘅我係好好壯態。我冇趕可以配音，但係我一定要出現喺個畫面。好無奈，但係我覺得都係一個責任嚟嘅。做得起其中一個主角，就一定要擔得起呢件事。」