【婚攝中伏記】影得差過李偲嫣　苦主：識韓文扮韓國攝影師？

齋諗都諗到，影結婚相係一件苦差嚟，但婚姻係人生大事，正常嚟講就一世人一次，所以辛苦都要影架喇，都係想留返個美好回憶啫。

不過，近日網上就瘋傳一對準新人影婚照嘅中伏經歷，有幾伏？據知就係幫襯咗標榜「韓式風格」婚攝公司，點知最後影出嚟啲相失焦、路人又多又搶鏡、影到新人陰陽面，一邊反光一邊背光，更誇張嘅係準新人更懷疑攝影團隊係識韓文嘅內地人假扮添。

為方便大家了解大致情況，不妨睇睇以下兩張截圖，係「受害者」即準新娘親自開post講述中伏經過。

「受害者」都唔係齋講無證據架，仲有附帶「出事」嘅婚照俾大家評評究竟係咪堅影得咁差。

睇完上述幾張所謂婚照，唔知大家又係咪同網民所講一樣，立即聽到直昇機嘅聲音呢？「伏！伏！伏！伏！伏！伏！伏！」其實香港人要正面啲，唔好成日俾負面情緒影響，反正唔影都影咗，都係一個幾難忘嘅回憶吖，只不過係「痛苦回憶」。

雖則涉事婚攝公司一直強調擺拍、連拍係韓式風格，希望影出新人的自然一面，又講到明後期執相修圖先係韓式婚攝風格的重點同精髓，不過莫講話該對準新人，就連網民見到啲相嘅質素，都好懷疑後製執相可以有幾靚。於是，有啲網民都算唔話得，自發幫呢輯出事婚照盡人士執吓佢。

後續故事就係準新娘質疑攝影師並非韓國人或來自韓國，於是向涉事婚攝公司提出諸如「提出攝影師全名、由韓來港的機票」等證明，不過與準新娘聯絡溝通的職員就似乎……都係自己睇截圖再判斷啦。

BTW，李偲嫣BB同樣都係5月出閣，但佢嘅婚照就好正，建議不妨向佢請教一下。