【果欄中的江湖大嫂】馮盈盈遭御用強姦犯強暴？李天翔獲讚好好人

TVB有唔少御用角色，除咗有李國麟做「御用敗訴王」、宣萱做「人質王」之外，仲有李天翔都係為人所熟悉嘅「御用強姦犯」。昨晚劇集《果欄中的江湖大嫂》就預告李天翔疑似將「又」要強姦人，今次對象係馮盈盈（Crystal）所飾演嘅小狼女。

李天翔入行20多年，早年因為認字特警一角而為人所熟悉。自2008年起，李天翔開始於劇集中擔任奸角，更因為經常飾演強姦犯角色而被標籤「御用強姦犯」。李天翔雖曾經表示演強姦戲「駕輕就熟」，亦因為佢在劇中強暴過嘅女演員多數都係一線花旦，令佢背負一個「強姦了全電視台女演員」嘅「罪名」，外人可能覺得佢艷福無邊，但李天翔就叫苦連天，呢個身份令佢非常尷尬，亦係佢之前決心向TVB提出轉為兼職演員嘅原因之一。本來以為轉做兼職演員有更大的自由度，甚至可以將「御用強姦犯」呢個頭銜寫進歷史，但今次好似都係走唔甩，要再做強姦犯？

同李天翔喺《果欄》中有大量對手戲嘅Crystal，接受《香港01》訪問，佢話有聽聞過李天翔是「御用強姦犯」，而對於強姦戲份則大賣關子，不過佢就對呢個拍檔讚口不絕，話佢係一個非常專業同有氣場嘅演員，「我第一次見到天翔真人行出嚟，我已經驚到腳都震埋，有啲場口佢要大聲喝我同鬧我，我要唔可以退縮同埋要好有氣勢咁頂返轉頭，但其實我內心眼淚鼻涕都想流出嚟，佢嘅氣勢真係好勁，畀佢喝一喝，我已經爭啲跪低，但個樣要扮到好有信心咁，其實真係好～難呀！」

Crystal話雖然天翔埋位時氣場強勁，但鏡頭外嘅佢其實好親切，Crystal仲多次大讚佢好人，「今次係我第一次拍劇，所以我好緊張，有時想喺片場影吓啲花絮相做紀念，但又唔夠膽，又好怕醜，天翔知道我唔夠膽影相，佢一得閒就拉埋我一齊合照，又有時我拍緊，佢得閒嘅時候，佢好好心咁幫我影花絮，等我有相Po吓，佢真係好好人。」

除咗幫Crystal影多啲片場相留念，天翔都有教佢做戲，Crystal所演嘅小狼女大獲好評，應該都要Credit返天翔，「有好多好長嘅獨白，我第一次拍劇，我真係唔知點去分析劇本同演繹，天翔係逐段逐句咁教我，用咩語氣去講對白，邊度係高潮位，邊啲位要加感情，佢真係好好人，雖然天翔畀大家喺『強姦』方面嘅印象好深刻，覺得佢好惡，但其實佢好好人好親切。」