【三個女人一個因】次次輸官司變御用敗訴王 李國麟：我墊高主角
撰文：冼燕珊
出版：更新：
TVB劇集《三個女人一個「因」》自播出以嚟好評如潮，最新一集講述由李國麟飾演的檢控官歐陽一波輸畀由袁偉豪飾演的利東佳，有網民在討論區直指李國麟次次打官司都輸，就算唔係做律師都輸，取笑佢輸官司輸足差唔多廿年，名副其實嘅「敗訴王」。
《三個女人》劇情講述利東佳首次以律師身份上庭，迎戰師公歐陽一波。雖然東佳想到辯護嘅絕妙論據，但在出庭前發現當中盲點而自信盡失，眼見有機會敗給歐陽一波，卻因為以因一句話令東佳重新振作，令到形勢逆轉，一向被歐陽一波睇低嘅利東佳竟然成功打低師公。
李國麟從演多年，所演的角色成日輸官司，令到討論區的一眾劇迷都封佢為「敗訴王」，話佢18年前在《男親女愛》中，飾演Miss Mo 嘅死對頭鮑一柱(Alex Pao) 都係成日輸官司，輸到依家。遠的不說，除咗《三個女人》，近少少嘅有佢於《溏心風暴3》中飾演嘅許雅麟，打官司都同告敗訴。李國麟Long哥接受《香港01》訪問，笑言多謝網民有留意他的演出，同時為所演角色不斷敗訴解畫：「李國麟所演嘅角色通常都係一啲表面好強勢嘅人物，其實佢哋都唔係一味輸，初頭都有贏吓嘅，但係面對主角人物，就算幾強都好，都要輸畀佢哋，用嚟墊高返個主角，呢啲劇情可以話係一條公式嚟。」