【開心速遞】John同Jenny偷情兼奸招上位　網友入戲憎到入骨　

講的就是John (何啟南飾) 和Jenny (陳偉琪飾) 喇。Jenny身為人妻但卻背夫偷食，瞞住老公龍力士 (鄭世豪飾) 同情夫John發展婚外情，仲使出連串陰招於公司內奪取權力地位。John同Jenny的惡行令到一班觀眾以及網民都睇得好投入兼好肉緊，甚至有網民開post話祝John同Jenny早日生愛滋死，大家都鬧得好毒㗎。

任何人被鬧仲要咁樣咀咒，都一定會唔開心啦，不過何啟南知道網民咁樣鬧他，就完全唔介意，仲話：「演呢個角色演到畀人鬧都開心㗎，咁證明我哋做到個效果，先令觀眾睇得咁投入。現實生活中暫時就無畀人鬧過，亦唔擔心會畀人鬧，其實我已經做咗好多呢啲角色，要擔心都唔係依家先嚟擔心。」至於John同Jenny之後仲有咩奸招，他說：「暫時未知，不過處境劇衰極有個譜嘅，唔會太衰，睇下編審點寫落去，編審好口密，講啲唔講啲，我自己都好好奇。」

陳偉琪也無試過因為演Jenny一角出街畀人鬧，她說：「反而係收到好多好正面嘅feedback，啲人又會走埋嚟叫我細龍太。咁喺網上畀人鬧都開心嘅，即係代表我哋做到件事。啟南佢教咗我好多嘢，我成日問佢意見，佢又會早啲返廠同我對戲，真係好好㗎。」她還透露Jenny之後仲有好多奸招：「例如搏同情，想大家唔好爆佢同John嘅姦情出嚟，有一集佢想炒湯盈盈，結果畀公司啲人玩得好慘，大家睇完一定會覺得Jenny都有今日喇。」

而她日前剛剛拍完第306以及307集，就是她拍劇以來的一次突破：「呢兩集主要係講Jenny同John，其中拍咗場好勁嘅喊戲，我真係喊得好淒慘，入行拍劇至今第一次喊得咁傷心，直情係喊到眼淚乾晒，所以都有用眼藥水，拍完返到屋企對眼仲係覺得好乾。至於點解會喊到咁大家到時記得睇喇，總之Jenny對John嘅感情係真心嘅，而John對Jenny係咪真心就唔知喇。」