《翻生武林》穿崩　大大個坑渠蓋長時間出現畫面中央

昨晚一集《翻生武林》中，有位「人兄」好搶鏡，雖然一句對白都無，但佢嘅企位比之劇中蕭正楠、陳凱琳、簡慕華等重要角色，企得更加突出、更加正中，令觀眾不自覺將目光停留喺佢身上，就連站在城樓上除褲驗明正身、露出美腿嘅黃智賢亦被比下去、被該位「人兄」搶晒風頭！講咁耐都未正式介紹呢位「大人物」，它就係渠蓋！

劇集穿崩少不免，無綫劇集穿崩更加係見慣不怪，相信大家隨時都講得出幾個例子，諸如：古代劇《食為奴》中張繼聰身後出現貨van、《帝女花》中陳豪一句「同朕再check下」等等。

【翻生武林】關梓陽處男劇 24歲新人為拍劇決定暴增磅

【翻生武林】TVB武俠片無進步？ 姜大衛：而家同拍電影差唔多

今次《翻生武林》出現穿崩真係毫不意外，亦唔會係例外，繼早前有網民疑惑點解明朝會有厚切三文魚腩，昨晚就大大個渠蓋得正正喺畫面正中央，令嗰幕情節睇落相當突兀。但大家唔好忘記，此劇劇情好多暗示、隱喻、諷刺、影射，又「盟主選舉」、又「蛇齋餅糉」、又「和平理性非暴力」等等等等。張漢斌都解釋咗係導演將劇本「生豬肉」改為「魚生」啦，所以今次渠蓋有咁重戲份，一定係有啲嘢想話俾大家知，除非唔係，

戲中的男主角蕭正楠在回覆《香港01》時表示：「係咩？好眼力喎網友們，其實佢哋有所不知喇，其實渠蓋喺明朝已經有，有幾年百歷史㗎喇。真係呢…戲就無人睇，睇渠蓋…其實嗰場戲嗰重點阿Ben（黃智賢），係佢呢個無蓋嘅渠，唔係地下嗰個有蓋嘅渠。」