黃秋生相認同父異母兄長　興奮直呼：知道消息嗰刻好似被雷劈咁！

只要活著，每日都會有驚喜！就好似影帝黃秋生又點會諗到自己56歲人都仲可以認返失散多年、成世未見過嘅兩個親阿哥。

是咁的，黃秋生以前曾於個人社交網站上Post出自己仲係襁褓BB時與父母合影的黑白照，並公開尋親指希望找到生父。其後有媒體BBC發現秋生尋親一事，邀秋生接受訪問，並提供協助。意想不到的事就此發生了！黃秋生遠在澳洲生活的兩位哥哥竟留意到秋生尋親的事，更認出相中人正正就是已逝的爸爸，於是就此展開了一段令人驚喜嘅相認旅程。

黃秋生4歲被生父遺棄　尋父52年早釋懷︰像疤痕般紀錄我嘅過去黃秋生甲狀腺出事要退休？　病到視線有重影︰當時食藥食到傻

終於在上星期2（3月20日），兩位同父異母的兄長來到香港與秋生見面，在BBC的節目中，秋生難掩興奮之色話：「我好開心，心諗點會發生喺我身上㗎？好Amazing、好Impossible、好Miracle，知道消息嗰刻好似被雷劈咁，你直情係反應唔嚟㗎！我見到佢哋嘅時候唔覺得生外，成件事好似好熟悉咁。通過佢哋我知道好多我爸爸嘅嘢，我亦因此知道點解我嘅行為會係咁樣喇。因為呢件事我覺得自己改變咗，好似俾啲嘢喚醒咗咁，發覺原來我都有啲嘢係開心㗎。」

至於秋生兩位兄長，則說：「爸爸從來沒同我們提過秋生呢位細佬，我哋完全唔知道，或者爸爸覺得話俾我哋知會尷尬，或者佢認為我哋知道後會唔高興，但我們兩兄弟傾咗傾就想嚟香港同秋生見個面，買到機票就馬上起程。我哋之前對佢一無所知，喺YouTube搵到佢嘅戲，知道佢係香港知名演員，但無令我哋覺得佢有咩特別唔同。如果爸爸仲在生，發現我哋知道有秋生嘅存在，佢一定會感到安慰，我敢講我哋一定會一齊啤啤佢。以前唔知道有個弟弟係遺憾，而家就好開心能夠搵到對方。」