【後生仔傾吓偈】偽ABC偽文青當道　馮盈盈嘆MK仔女變稀有動物

當踏入MK再搵唔到MK，咁MK仲係唔係MK。面對住偽ABC、偽文青等等文化喺香港插旗、發展，MK文化就隨住時間慢慢咁樣失去咗佢嘅領導地位，亦開始逐漸褪色變成昔日嘅一部分。最近，無綫節目《後生仔傾吓偈》就用咗兩集嘅時間探討MK文化，主持陸浩明、麥明詩、馮盈盈同一班KOL，就由衣著出發再講到MK仔女嘅行為習慣，以及將MK文化同現時發光發熱嘅偽ABC、偽文青文化作一個比較。

咁其實MK文化係啲咩？MK本身係指Mong Kok（旺角），MK就係Mong Kok裡面取首兩個子音字母得出嚟嘅簡稱。喺普遍睇法裡面，MK文化係為吸引注意或者建立形象而盲目跟風，但最後卻搞到自己不倫不類嘅一種風格。有咩行為係會有MK味？創造「MK」呢個簡稱本身已經係有一種MK味，而將頭髮染成鮮金色、鮮紅色等搶眼顏色，喜歡騷紋身，隨街大聲講粗口，以及著住黑色背心孭名牌心口袋等都可以被視為MK文化嘅呈現。

雖然好似好負面咁，但馮盈盈就有自己嘅睇法：「MK係香港獨有嘅文化、精神，你冇理由喺俄羅斯見到MK。要好好珍惜MK仔、MK妹。」入行前有一頭金髮嘅佢，就因為平時貼地嘅言行，而獲一眾網友封為「MK之后」甚至「MK教主」，佢好撐MK文化，覺得呢個係香港土生土長、同時又係集百家之大成嘅精神，同香港呢個中西文化交匯嘅地方好Match，只可惜慢慢咁畀外來嘅嘢掩蓋咗。

馮盈盈接受《香港01》訪問時，就指MK精神係好值得捍衛：「呢樣嘢係好有香港本土特色，我從來唔覺得MK係有貶意，而且仲係好值得保育。可能依家MK仔女真係買少見少，為咗捍衛呢種文化，亦因為我份人好接地氣，好多志同道合嘅人都封我做『MK教主』、『MK代言人』。（但你港姐冠軍嚟，唔係要高貴大方？）可能我學生時代金色頭髮嘅形象太深入民心，上網Post文都係用口語，不過我唔會抗拒嘅，亦唔覺得要去做咩去洗底，因為呢係我嘅特色。」

馮盈盈續謂：「對於我嚟講，MK文化係一種大無畏、Dare To Be Different嘅精神，好似我本身份人比較大膽，語不驚人誓不休咁，有種青春、不羈嘅感覺。」聽落就有啲將MK文化再定義嘅感覺，而佢亦都覺得MK文化應該繼續演變、進化：「有啲行為應該要改，好似吸煙咁，因為MK仔女真係愈來愈少，繼續吸煙只會令MK仔女變成稀有動物，長命啲先會有機會繼續宣傳MK文化。」

至於可以做咩具體上嘅嘢，去捍衛MK文化？馮盈盈喺心裡面其實有一個宏願，就係好想將令大眾再重視MK文化，從而重拾其他相關本土情懷，去建構一種地道文化去取代外來文化，再以呢個潮流使到市民有個覺醒，令加強本土意識：「依家開始有聲音話MK文化係代表一種好率性、率直同爽朗嘅香港集體回憶，以前可能唔覺，但到依家少咗時，就開始有人緬懷，所以年輕人要學習擁抱返自己嘅本地文化，等大家愛護返、重視返本地情懷，咁樣已經係對MK文化最好嘅捍衛。依家都見到唔少報紙、雜誌會介紹啲好有本地情懷嘅地方做周末好去處，呢個都係一個好好嘅開始。」

重溫馮盈盈MK時期嘅相片：