李佳芯會同男友陳炳銓嘈交？ 滿分女友好硬頸：我好有主見！

李佳芯（Ali）喺剛剛過去嘅一年裡面真係好犀利，雖然佢未能夠喺台慶頒獎禮得到視后榮銜，但就喺新加坡度得到最佳女主角獎，平時嘅表現亦賺取咗好多獎聲，而佢喺尋晚舉行嘅「微博之夜2017 - 香港站頒獎禮」亦再下一城，贏得「微博年度突破演員」獎項

對於得獎，Ali就覺得好興奮、好開心，覺得往年嘅角色都帶畀佢唔同嘅突破，而之後會播出嘅無綫新劇《BB來了》亦好有挑戰性，因為現實中冇BB要飾演一個媽媽。問幾時至真係同男友陳炳銓（Danny）結婚生B，她答謂：「真係冇同佢傾過，我哋依家都係事業搏殺期，唔敢計劃結婚住。」

唔講咁遠，講下呢Pair情侶之後有冇機會合作。Ali就話好難叫得郁佢入TVB：「佢唔甘心淨係做演員，佢做幕後都好強，教班、導演咁，我覺得佢入TVB係嘥咗佢！佢依家咁好好，可以同時做好多樣嘢，唔係淨係做演員、導演。」

Ali就話唔一定要同男友有幕前嘅合作，佢哋私下都成日有好多藝術上嘅交流：「大家睇完大家嘅演出都好有交流，佢有佢睇法，我有我觀點咁。（佢才子上身狠評你演技？）佢又唔會，藝術冇話好唔好，都係處理手法嘅選擇，佢唔會批評我之餘都唔會批評其他人。」

至於Danny會唔會忍唔住教Ali做戲？她笑住答：「冇得教，我好有主見！我揀得一樣嘢就有佢原因！（會傾到演變成嗌交？）會好激烈，但未至於會嗌交，都係因為討論演繹方法選擇上嘅問題。（大事各持己見，小事你話事？）又唔係喎，有時收工好攰，會咩都唔想諗，問一陣食咩時，多數都係叫佢話事，我最多都係話想食辣咁。」