張景淳親解留長髮原因：哪怕同角色造型有衝突

張景淳四個月前加入《愛‧回家之開心速遞》劇組，一身西裝造型，但配以長頭髮加金絲眼鏡，但呢期男仔唔係好興長髮喎，張景淳點解要速流而行呢？原來係有佢嘅原因，「我細個特別鐘意日本嘅劇集同音樂，當中好多藝人歌手都留長髮，尤其係我最鐘意嗰幾個藝人歌手，木村拓哉、福山雅治，江口洋介等等，全部都係長頭髮。而當中最影響我想成一個歌手嘅就係Beyond嘅家駒同埋張國榮，佢哋都留過長頭髮，所以留長髮呢個信念好根深柢固，令我好想留一次長頭髮。」

「以前細個雖然喺外國讀書，但都係無勇氣留到好長好長，雖然已經比一般同學仔長。」張景淳說，讀書時無機會留長頭髮，到畢業回流香港加入TVB，對於髮型的自主權更小：「到我入到TVB，好多角色都要剪短頭髮，甚至乎係要剃光頭。」張景淳似乎苦等多年都好似無咩機會將把頭髮留到好長，但近兩年，佢終於不顧一切留長頭髮，哪怕係同角色造型有衝突，只為完成一個心願：「我想試一次，留到我覺得滿足，到我可以接受，同埋我覺我長頭髮畀人嘅印象深刻啲。」

的確，張景淳留長頭髮的造型具有一定嘅標誌性，而且好像愈看愈順眼。其實潮流係一個循環，話唔埋過一排又興返長髮，而呢個潮流又好可能係由張景淳帶領，而佢依家只係可能行得太前。