田馥甄笑談「禁慾」兩周　問及感情生活令人聯想周董《退後》

台灣知名女子組合S.H.E成員田馥甄（Hebe），原來已近3個月無公開活動喇，就連個人社交網站都近1個月無任何更新，令唔少fans擔憂。日前佢終於蒲頭出席公益活動，事後接受採訪先得知，原來佢最近患上重感冒，仲講笑咁話過咗兩星期「禁慾」生活！

Hebe所指的「禁慾」生活究竟係點樣一回事？是咁的，其實Hebe一早已被好姊妹陳嘉樺（Ella）嘅囝囝勁寶所吸引，但怕感冒傳染「愛郎」，所以要過壓抑「見勁寶的慾望」足足兩星期，難怪佢話：「現在好了，要把握時間去見勁寶，因為能見到他的時間是很有限的。他早上醒着的時候，我可能還未起床。到我起床時，也可能來不及見他，因為他下午3點又要睡午覺。直到大約4點半至7點左右，就是找他的黃金時間。要是不在這段時間內找勁寶，就只能見到他媽媽。」

其實Hebe咁鍾意小朋友，加上再過多一個星期左右就會迎接35歲生日，係咪應該要諗諗人生大事呢？據知在場的記者也有問及相關問題，而Hebe就回答得相當搞笑：「我以為還在過農曆新年，然後在這遇到親戚咧。」

之後有記者問到Hebe為何愈來愈少更新個人社交網站，佢起初呆一呆，然後得啖笑，最後仲死死地氣咁承認：「我是有點懶惰。」打蛇隨棍上，有人問多句「什麼時候會更新？」Hebe口講盡量，實際上就好乖乖咁出新post，內容簡而精只有一個字：「文。」

講到呢度本來想完，但提到Hebe感情生活，近日周董演唱會又進行得如火如荼，腦海隨即有「想當年」3隻字，然後就醒起當年的「J.H戀」。記得應該係2006年嘅事，有傳周董喺英國為《夜的第七章》拍MV期間，Hebe亦喺英國遊學，男方於是在當地為女方慶祝生日，並同遊倫敦，二人緋聞由此而起。之後周董為《退後》拍攝MV，並以MV導演身份邀請Hebe擔任MV女主角。其後女方更曾回應傳媒說：「不是不喜歡（周杰倫），大家都會喜歡才子。」因而將「J.H戀」的曖昧程度推至最高。

重看《退後》MV，周董飾演嘅蠱惑仔依然是壞壞的，但自有種難以拒絕嘅魅力。至於Hebe飾演嘅賣果汁妹仲係相當青澀可愛。無奈二人單純而錐心嘅愛，無論再睇幾多次都係令人感覺婉惜，都係嗰句「最美的愛情回憶裏待續」。

好想喺周董演唱會上對住周董本人，感受一次《退後》帶出嘅傷痛同遺憾，奈何現實支咪總係交到彈頭手上。坐喺觀眾席上，唯有安慰自己：「《退後》係由彈頭填詞，由佢唱出都好順理成章、合情合理。」