鄧紫棋同經理人張丹慶生：食完蛋糕又嗌交　

鄧紫棋(G.E.M)日前同經理人張丹（Tan）慶祝40歲生日，G.E.M於IG寫道：「我和Tan的日常談話內容都是7分爭吵3分和氣⋯當這個生日蛋糕吃完以後，我們又開始吵了⋯⋯#我們的相處方式／#吵吵鬧鬧又一天／#遲來的生日快樂／#從他28歲認識到他終於40歲／#男人40一枝花」G.E.M大爆老闆年齡，被Fans留言取笑話要扣人工。

G.E.M同張丹認識12年，計返G.E.M.今年26歲，即係14歲就已經認識對方，而佢一出道，已經簽約張丹成立嘅蜂鳥音樂，直至現在。G.E.M話成日同張丹嗌交，其實應該都係事實，張生又真係成日辣著火頭，為阿G.E.M製造過唔少公關災難，得罪過唔少人，包括香港記者同內地電視台。前幾年有次突然拒絕本地平面傳媒採訪，但包機票、五星酒店，請大陸記者來港採訪睇騷，當時張丹更加指有唔少歌手對港媒都避之則吉，得罪本地傳媒，令阿G.E.M陷入一個尷尬地步。唔只香港傳媒，之前有傳張丹喺G.E.M爆紅後，在內地接騷獅子開大口，觸動內地神經，一度被封殺。所以依家阿G.E.M喺中港兩地人氣下滑，某程度都係多得佢。

據聞阿G.E.M對於張丹嘅種種安排都好無奈，甚至想過跳糟，不過除咗有約在身，兩人識於微時，所以無走到不特止，仲加簽長約。不過又唔可以一面倒怪晒張丹，畢竟都係佢將阿G.E.M捧上高峰。