【搵食飯團】節目特別旺女主持？　李佳芯、陳凱琳拍完上位做女一

唔知大家有冇轉台睇過J2，有個超長命節目叫《搵食飯團》，由綠葉做主持介紹香港嘅特色餐廳畀大家，元祖主持係由巨聲幫陳國峰同大隻仔溫家偉，再加上港姐華姐陳凱琳、鄧佩儀同趙希洛做班底。本身節目畀大家感覺就唔多起眼，但就唔知係節目腳頭好，定真係好似藝員訓練班咁，令到一眾藝人磨練喺鏡頭前嘅演技，個個做完《搵食飯團》嘅女星都可以上到位做女主角。

其他唔講，近期被大家講得最多嘅李佳芯就係人版，佢絕對係大台力捧嘅當紅炸子雞，連3年前嘅倉底劇《波士早晨》都要拎返出嚟播，就知道大台有幾鍾意李佳芯。先喺《巨輪II》被鷲哥鬧「臭雞」上位，之後拍嘅劇集好似《與諜同謀》、《踩過界》好似幫佢鋪路咁，就連台慶劇《誇世代》都搵佢做女主角，就知道李佳芯離擺上神檯做視后不遠。

仲有陳凱琳，你可以話係佢男友鄭嘉穎帶紅佢又得，話節目令大家再認識佢多啲又得，反正佢由拍完《搵食飯團》之後，拍親嘅劇集都係做女主角，套套都係，好似《翻生武林》、《平安谷》、《殭》、《張保仔》咁，套套都係大台嘅重頭劇，想唔紅都唔得啦。最後不得不提鄧佩儀，佢絕對係國際中華小姐中嘅黑馬，雖然同李佳芯同陳凱琳就冇得比，未算係擔正做女一，但大台都畀好多機會佢去試，年年都有幾套劇渣手，睇好你啊！