馮盈盈自認係麻煩旅行腳：不過啲朋友好好無話唔想再同我去旅行

成班朋友去旅行最驚遇到咩？最驚當然就係遇到超麻煩/ 難頂的旅行腳啦，有網民就開post討論同行友人做咗咩會令你唔想再與對方去旅行，留言包括有「去到邊都要人幫佢係咁影相」、「唔plan行程但又多多意見」、「去邊度玩都話悶」、「要去布吉又驚曬黑，全程擔遮仲要插親我隻眼」、「屎怪，一日到黑周圍搵廁所」、「去日本，連1Yen都要計到足」、「唔肯起身出去玩」、「勁慳唔捨得唱錢shopping買嘢，要用公數」等等，唔知大家又可有同感呢？

馮盈盈 (Crystal) 當然都有同過朋友去旅行的經驗啦，她就好好彩，暫時仍未遇過甚麼麻煩或是難頂的旅行腳，Crystal不禁笑住話：「其實實不相瞞，我就係好麻煩嗰個旅行腳。通常成班朋友一齊去旅行，我讀大學時都試過，我都唔算係好難照顧嘅，唔會好公主病咁例如行多兩步就跪咗度，都會同大家周圍去四圍行。不過我有樣嘢都幾堅持嘅，就係去到我覺得比較特別嘅景點，可能喺佢哋眼中係所有嘅角落頭，都會想影張相。」

Crystal憶述她讀大學時的一次難忘旅行：「嗰次我哋兩女一男去美國，咁我係有意識以嚟第一次去吖嘛，所以去到邊都要影相，點知同行兩個朋友又唔係太鍾意影相，但佢哋都好好，係咁不停幫我影相，我覺得好有紀念價值嘛，後嚟影到個男仔忍唔住話『嘩，真係頂你唔順呀，又要影。』不過佢影啲相都唔差，都影得我幾靚，無話嫌我成日要影相就hea影。」

除了瘋狂要人幫她影相之外，Crystal自爆自己仲有另一樣麻煩之處：「嗰次我哋租住appartment，唔知點解美國嗰啲廁所沖水水力好似麻麻地。咁我去成個月就梗係要去大便㗎啦，我去到啲陌生環境嘅廁所又特別注重乾淨，會用好多紙巾抹乾淨甚至舖好先用，但又要撞正呢個無乜沖水力嘅廁所，唉，就唔知點解連續幾次我都痾塞咗個廁所，要搵人嚟通返個馬桶。開頭嗰次我兩個朋友都會覺得係個廁所沖水麻麻，到第二、第三次發生之後，佢哋就話『喂呀，盈盈你可唔可以用少啲紙巾？或者你逐次逐次沖啦。』我有跟住做㗎，奈何外國廁所沖水真係麻麻地，仲要鑊鑊都係到我用完之後就塞，激死我。」而Crystal的朋友亦因此而笑了她好耐，但就無話唔想再跟她去旅行，他們的旅程都好開心㗎。