高海寧曾遇變態阿伯貼實背脊行：有嘢頂住驚到唔敢出聲

高海寧（高ling）出名樣靚身材正，這晚她於蘭桂坊夜場出席香檳品牌活動時，就穿上吊帶低胸貼身開叉裙亮相，相當性感迷人，在門外已惹來大批途人向她行注目禮。高ling曾透露自己家教好嚴，就算長大後也極少到夜場玩，問到她出街時又會否經常畀人撩，又或是遇到狂迷跟蹤呢？對此高ling說：「入行後又無乜喎，反而入行前就試過遇到變態伯伯。」

原來高ling亦曾經遇過這類「#me too」經歷，憶述起當時的情境依然歷歷在目，「我嗰時讀緊中三，住喺旺角要去銅鑼灣讀書，咁朝早返工返學啲時間地鐵好多人，由油麻地去金鐘嗰段真係迫爆。有日有個阿伯跟喺我後面，貼住我背脊行，我完全係feel到佢身上有嘢頂住我，我轉身避佢，佢竟然係跟住我轉，一直痴到我實。我當時好驚又唔敢出聲，由於太迫人同啲同學分散晒企，無得向佢哋求救，去到金鐘站我終於忍唔住，推開晒啲人跑出車廂，啲同學都追咗上嚟問我咩事，結果發現我條裙後面濕咗，我仲因爲咁嗰日返唔到學，要返屋企換咗條裙。」

高ling話自己以前細個唔敢出聲，但現在已經唔會再啞忍，一定會即時阻止並鬧返對方，亦會挺身而出幫助其他人：「試過有次我喺地鐵見到有個男人用手機偷影個女學生，個女學生瞓着咗擘開咗對腳，個男人就扮玩電話對住個女仔雙腳中間偷拍，我即刻好大聲話：「嘩！你影乜嘢呀？！」隔離啲女士見我出聲，都幫口鬧埋一份，仲有個女人叫醒個女學生提佢要小心。」