【罪光燈】同殺人犯做朋友 花家姐：細細個已懷疑自己有犯罪基因
基督教指每個人生來就是罪人，但在現世中會受到審判的人卻少之又少，皆因大部分人犯罪都係得個諗字，無幾多個會付諸實行。奇案女王花家姐身邊的「重量級」朋友，卻是真真正正的重犯，有因謀殺罪被判終身監禁，也有因為持械行劫判幾十年監，她的茶友包括有「寶馬山雙屍案」譚士歡、「紙盒藏屍」歐陽炳強、殺警劫匪文錦棠，全部赫赫有名。花家姐說：「人人都會犯錯，睇下有幾大單啫，我會當正常人去睇佢哋，等佢哋可以重新做人」。
ViuTV逢星期日晚播出的《晚吹─罪光燈》，顧名思義每集都會講解一系列香港奇案，主持有歐錦棠、可宜，最重要是有奇案女王花家姐，她可說是中外奇案的活字典，在網台專講奇案，由她主持的《東頭灣道99號》，深受兇案迷追捧。她接受《香港01》訪問，謙稱「千祈唔好咁講，奇案女王係翁靜晶，我只係一個奇案研究者。」花家姐說她小時候有過偷東西的想法，「當時都係10歲、8歲，我會諗自己係咪有犯罪基因，之後一路長大對罪案、推理小說都好有興趣，尤其係河洛寫嘅《奇案實錄：二十年來香港驚人罪案》，一直都有睇直到作者離世。」
花家姐曾任職商台8年多，廣播劇《靈幻搜奇》就是出自她的手筆，翁靜晶的《危險人物》也是她擔任幕後工作，從此與香港奇案結下不解緣。花家姐的朋友清單，仍在獄中的有「百德新街兇案」余偉發，至於假釋出獄的釋囚，一起飲茶的歐陽炳強、文錦棠、譚士歡，普通人跟他們一起飲茶，肯定會不寒而慄，尤其想起行兇過程，再望望枱頭碟鳳爪、牛肉球，什麼胃口也沒有。「陰沉凶狠、目露兇光，呢啲係電影拍出嚟嘅，佢哋睇落同平常人無分別，人人都會犯錯，睇下有幾大單啫，我會當正常人去睇佢哋，佢哋有乜過錯都已經受到懲罰，依家出返嚟，係咪可以俾個機會，等佢哋可以重新做人。」
相關文章：
【罪光燈】神棍山埃符水謀財害命 德福5屍命案竟牽涉第6名死者？
雖然花家姐跟這班釋囚是朋友，但絕不會用關係來套料，「做朋友當然唔會咁功利，而且佢哋都唔講以前嘅嘢，覺得要顧及死者家人嘅感受。(諗起佢哋嘅身分，會否覺得恐怖？)唔會驚啦，反而當譚士歡患上末期癌症，知道佢就嚟死，自己又做唔到乜嘢，感覺唔係咁好。」不過花家姐說不是所有重犯也做到朋友，像殘殺援交少女王嘉梅的兇手丁啟泰，「佢戒心好重，而且當年壹週刊記者去探監，將佢啲嘢寫晒出嚟，之後佢好唔開心，對其他人亦好有防範。」
對研究兇案廢寢忘餐，每一個細節都會慢慢琢磨，花家姐已經習慣兇案的殘殺嘔心過程，而她的女粉絲甚至在她講完美國一宗兇案後，要求睇返殘肢原片，相當大膽。但花家姐說經常接觸兇案，難免「日有所思，夜有所夢」，花家姐每晚都會有關於兇案的夢境，「我每一晚發夢都係殺人、被殺，又或者殺人埋屍，有時都分不清現實定係夢境。」問到她近年的兇案，動不動就殘殺肢解，行兇對象甚至是親人，是否因為新世代已經變得愈來愈無情冷血，她說：「奇情多咗就真，因為多咗CCTV，犯案時要做更多嘢，無以前個年代咁簡單。」無論如何，死者不幸遇害，在生的家屬心情可想而知，每一次提及兇案，也是對在生者的折磨。