神級編劇重返無綫　陳寶華踢走膠劇：想大家覺得港劇仲係好睇！

曾經打造《我本善良》、《十月初五的月光》等經典劇集的神級編劇陳寶華雖然已經離開無綫16年，但最近卻因高層杜之克、余詠珊的「N顧草蘆」而打動，決意回巢以總監製、總編審身份主理新劇《多功能老婆》，為港劇再創新局面。

15年前開始在內地發展的寶華姐坦言杜之克近年一直都有力邀她回港長做：「但我同佢講我唔會放棄大陸市場，到佢第二次再講，我直情話你唔好再講，專心食飯啦！不過，之後我就諗，如果佢同余詠珊唔搵我，我喺港劇嘅句號就係亞視嘅《萬家燈火》，我就諗如果我應承佢哋，係咪真係可以為港劇帶來新面貌，我係為咗港劇而應承佢哋，因為港劇令我喺大陸傲視同儕，係港劇養大我。」

問是否不滿現時港劇質素，寶華姐即答謂：「我唔會，因為唔係一個人造成咁，即係我都唔可能一個人搞到咁大壇嘢，亦都唔可能一個人搞垮呢行，所以士氣係好緊要。（想用呢套劇帶起龍頭作用？）我冇咁叻，我只係想大家覺得港劇仲係好睇。」又指自己今次是做「喜歡做」和「值得做」的事。

提到女主角人選一直保密，直至今日才在會上公布由金像影后楊千嬅飾演，寶華姐就話千嬅夠貼地，所以是最佳人選：「笑容親切之餘仲笑得好真心，個性又好直，同我本身有啲似。多謝余詠珊綴合，當初我都唔敢諗係佢，天后喎，本身又冇合作過冇交情，係余詠珊話如果佢搵到千嬅，係咪會返無綫，我話佢真係搵到先講，點知佢真係搵到。」至於之前一直有傳鄧萃雯會做新劇女一，寶華姐就指完成《多功能老婆》後，無綫或會找她和雯女再開新劇。