張栢芝宣布將舉行20周年音樂會　以香港為首站免費入場

今年係張栢芝入行第20年，佢舊年已經預告想辦一場免費音樂會，回饙粉絲一直以來嘅支持，近日佢終於落實搞呢場音樂會，名為「張栢芝20周年紀念粉絲見面音樂會」，係堅免費嘅，仲以香港為第一站，呢個將會係栢芝入行以來，首場演唱會，栢芝仲喺IG度叫大家向佢經理人報名。

不過栢芝就無公布詳情，而經理人事後留言話「時間及詳情另行通知」，強調「此活動不用收費，舉行只是想支持cc柏（栢）芝的朋友一起共聚20周年的時光」，目前暫時以香港為首站，其他國家嘅粉絲請考慮到香港參加這派對活動。栢芝舊年開Live講過：「我想開180人左右（的演唱會），但這個人數好像開生日會一樣，我自己book K房都得，1800個你們覺得有可能嗎？」甚至話不介意有路人或晨運阿婆幫佢坐滿個場，栢芝補充話如果人數達標佢仲會即刻去練舞：「不會性感但一定很勁爆、很專業的那種，想讓你們看到歌手張栢芝的一面。」

栢芝話開音樂會，好多粉絲留言話要報名，雖然栢芝已經留咗經理人E-mail，叫大家循呢個途徑報名，不過可能講得太簡單，有粉絲話唔識報名，栢芝都好有耐性咁親自回覆，非常親民。其實栢芝啲歌都算陪住一班八、九十後長大，《星語心願》、《賭愛》同《任何天氣》，真係首首都識背！