徐錦江獨子考「北影」做小鮮肉　隨時做TFBOYS王俊凱師弟

近年長駐內地的徐錦江，主力搞藝術，師承已故嶺南畫派國畫大師關山月的他，更在安徽蚌埠市投資近5千萬開設藝術園，預計今年夏天正式開幕。

由於爸爸長期駐守內地，徐錦江囝囝徐菲（Figo）近年亦北上讀書，就讀國際學校的他曾經話過將來打算做醫生，因為自覺無爸爸做戲咁叻，所以唔打算入行，但徐菲的意向，最近似乎有所改變，去年被電影公司睇中力邀拍戲的他，日前就被發現去到北京電影學院進行考試。只見18歲的徐菲生得十分之壯見，睇落同媽媽好似樣，唔少網友更指徐菲同韓星李棟旭有幾分相似（唔係卦？！）唔好睇徐菲斯斯文文，原來佢一直都有跟著名武打明星吳樾習武，而本身又識彈古箏，名副其實動靜皆宜。

之不過，今次投考北京電影學院的人數多達4.5萬，創歷史新高，熱門的表演學院雖然有近9千人報名，但只會收入50人，競爭率極高。去年因《琅琊榜》而彈起男星吳磊，日前亦有份去到北影參加考試，雖然唔少藝人投考，但校方早就講明「我們對所有的考生一視同仁，也沒有特別去關注哪位考生是不是明星考生」。