蔡少芬20歲空氣瀏海靚到暈　受熱捧Ada親回：我是 美~女~芬！

早前蔡少芬上載多張攝於1993年，20歲時嘅一批劇照，無添加淡妝Baby Fat，加上空氣瀏海令人驚艷，唔少網友讚嘆Ada當年真係靚得誇張。大家一面倒讚嘆幾咁靚，但Ada居然表現得相當無奈，呢日留言話：「可那個時期卻沒人說我美！現在這個時期好多人說我不夠從前美……」

蔡少芬放返20歲時啲相上網　網民驚呼：佢個空氣瀏海靚過晒啲韓星

1991年當時只得17歲嘅蔡少芬參加香港小姐，以大熱姿態奪得季軍入行，馬上受TVB力捧。1993年Ada一年內有5部劇集播出，其中四部《魔刀俠情》、《如來神掌再戰江湖》、《金牙大狀》及《馬場大亨》擔正第一或第二女主角，而劇集《天倫》雖然只係客串，但首度挑戰壞女人角色而獲得好評。

對於20歲時嘅舊照掀起熱話，Ada貼出自己嘅舊照以及近照留言話：「最近好多人說那個時期的我好美...可那個時期卻沒人說我美！現在這個時期好多人說我不夠從前美...但我信再往後十幾年，又會說這個時期的我好美！我只想說~不管什麼時期的我！我都是我 美~女~芬！」

自信十足嘅Ada無幾耐之後，再轉發老公張晉嘅微博，原來張晉影低囡囡畫Ada嘅樣，頭髮飛起晒著住件衣不稱身嘅衫，唔……應該係行抽象派畫風。Ada笑言：「我實在接受不了。。畫得太似我啦！沒有美圖時的我！」