【名模secret】模特兒為行巴黎時裝騷用盡方法瘦　食藥扣喉好普遍

大家一聽到模特兒呢個term一定會想到既高佻又纖瘦的身材，瘦仿佛已成了模特兒的代名詞，尤其是行國際時裝騷的model，瘦更加是必須的，節食減肥是例行公事。年前《Vogue》澳洲版前總編輯克Kirstie Clements就曾經出書爆料，指有模特兒為keep住激瘦身材，只吃廁紙充飢。本地名模伍靜麗 (Angie) 入行多年，亦曾到過巴黎行國際時裝騷，當然也見過不少model為了瘦而用盡各種方法，她說：「我真係見過有model食廁紙飲可樂當一餐，因為廁紙吸收咗可樂會發脹，咁就可以有飽肚感覺。」

模特兒想在巴黎行騷就要達致所謂Paris thin標準，為此她們都不惜捱餓來令自己變得更加纖瘦，不夠瘦絕對不會有機會被大品牌選中，故會出現大批瘦到好似患有厭食症咁樣的model。Angie指出雖然近年這股風氣有所改善，但情況依然嚴重，她說：「好多時裝設計師都鍾意用超細碼model，認為骨感啲着衫會靚啲，而佢哋啲casting揀model，好多都係一嚟就量度個pat pat圍，如果唔夠瘦即刻會被淘汰，你唔會知個要求係要有幾瘦，啲設計師唔會講你知，所以你只有令自己有咁瘦得咁瘦嚟爭取被取錄行騷嘅機會。」

Angie雖然無誇張到食廁紙來keep瘦，但她都試過用一些極不健康的方法：「除咗成日捱餓，亦食過減肥藥、瀉藥同埋扣喉。食驚會食到手軟腳軟無晒力，又會好抑鬱，好唔開心，扣喉直情變成一種強迫症，只要一食嘢就會即刻想扣喉。嗰段時期情緒好低落，仲要睇心理醫生接受輔導，好彩有屋企人嘅支持，自己亦都諗通咗。依家我只會靠健康飲食同做運動去保持身材。」