何超蓮又有新搞作　唔靠屋企自資過百萬灣仔開店做「牛肉麵女王」

何超蓮至去年（2017年6月）完成家族公司於澳洲的酒店計劃之後，就多了「最靚酒店CEO」這個稱號。何超蓮接受《香港01》訪問時亦表示澳洲酒店（Intercontinental Perth）近日已開始上軌道。不過當大家以為「賭王千金」何超蓮會甘於做酒店CEO就大錯特錯。因為就在最近，她又有新搞作。今次仲要一反大家對她固有的印象，開牛肉麵店，做「牛肉麵女王」。

據知何超蓮已買下台灣「玖五牛肉麵」的海外代理權，緣自於與牛肉麵店老闆的女兒份屬朋友。而因為有次在麵店吃到與香港不一樣的味道，才動意在港開店。何超蓮說，她除了投資做老闆之外，更會親自試菜。「而家搞緊裝修、牌匾同埋店面嘅deisgn，之後仲有台灣師傅教導我哋煮牛肉麵。我而家每日都係試緊每一個菜，香港買嘅材料味道啱唔啱。4月頭開幕，仲會請埋傳媒試食。（市民有冇份？）開幕嗰日我哋都會有優惠嘅。」

何超蓮表示牛肉麵店座落於灣仔洛克道。其實香港人都知道地租貴，就連即將開店的何超蓮都嘆租貴。「都貴㗎，所以就要俾心機做個營業額。（驚唔驚蝕錢？）都擔心㗎，始終都係自己錢創業，好緊張。（投資咗幾多錢？）7位數，過咗1字頭，所以一定要成功。」何超蓮年紀輕輕就可以自己投資2百幾萬創業，真係犀利。據網上資料顯示，該牛肉麵一碗賣台幣140（港幣約35元），問到身為老闆的何超蓮，香港一碗賣幾錢。她說：「未定價錢，但係我哋嘅麵係行養生路線，冇加味精，所以就唔會特別平，當然都係唔貴嘅。」不過香港舖租咁貴，唔知要一日賣幾多碗先夠呢？