【早霸王】西瓜離職要多謝森美　8年有遺憾：錯過機會表達真情感

早前《早霸王》的西瓜（李澄）在節目上公佈將辭職離開商台，震驚13億人口，聽眾都在猜想西瓜是不是受了委屈，明明在商台工作了8年，怎會突然要走。網民即刻人肉起底，翻查之前的節目紀錄，指西瓜一直被森美欺負，力數森美不是，列出罪證，先有「被笠絲襪」，再有「被掟蕉」，個個更當正自己是西瓜為她抱不平道：「俾我日日被人鬧蠢，正常人都頂唔順辭職啦！」

儘管西瓜之後解釋了幾遍，她跟森美之間的互動都是節目效果，離開是因為覺得是時候了，該出去闖一下，見識不一樣的世界，她說：「事實上要好多謝森美，冇佢我都冇今日，學識咁多嘢，有人認識。離開商台係一個大決定！」但網民頑固的覺得西瓜講的都是場面話，認定西瓜是被森美逼走的。

不知不覺，今天就是西瓜離開商台的Last Day，她也很識做預備了散水餅給同事，臨走亦幫公司講好說話：「Last Day當然唔捨得，我好鍾意呢個崗位， 但係我覺得公司好好，佢哋都好願意去見到如果你想出去闖吓嘅，你就去闖吓啦，好開心佢地令到離開變得容易。」

在一間公司工作8年實在是不容易的事，這是西瓜的第一份工作，更添上一份不捨，問她在公司最捨不得什麼，她表示就是大家覺得一直霸凌她的森美和小儀，「其實喺呢度工作咗8年時間，我最唔捨得嘅係森美小儀，佢哋教曉我好多嘢，我唔敢膽話自己做得好，但覺得每日有機會去試煉、去開咪已經好開心。自從宣佈離開商台，大家成日都Loop住森美掟我條蕉果條，其實係好開心、好溫馨㗎真係，大家話佢蝦我，有陣時我真係抵鬧嘅，係好好既效果囉。初初嘅時候對答真係好唔流利，其實後尾佢哋好多時會畀意見我，慢慢改進，我覺得都叫有進步嘅。」

西瓜在節目裡點播完最後一首歌之後，也不禁感觸流淚，原來中間還發生了一件在整個DJ生涯的遺憾事，她繼續道：「憾事係喺今日發生，我一個朋友因為Cancer走咗，本身我今朝諗住喺節目度同佢打吓氣，希望佢加油努力抗病，最尾我冇講到，我覺得冇理由將私事、唔係太開心既事講出嚟。佢喺今日中午嘅時候離開咗，回想返有陣時可能呢份情感，其實係可以令聽眾多啲去諗身邊嘅人，或者係自己錫嘅人，有少少遺憾錯過咗機會去表達真實的情感，因為咁反而令聽眾更有共鳴。」

西瓜今天Last Day跟同事影相食餅後，亦匆忙離開了商台，因為她還有別的工作要忙。之後她會主力發展配音、司儀的工作，更揚言要踩過界撈埋電視，歡迎大家找她工作，大家就放過森美吧，What happened to 早霸王 stay in早霸王，希望西瓜離開903後會有更好的發展。