【獨孤天下】《真情》盧慶輝3個鏡頭就Bye Bye　對白只有13個字

冇睇過都有聽過香港演員北上發展都做得風生水起，發展平平的他或她一返到大陸唔係做主角就係做二線角色，就好似TVB御用傻仔戴耀明（《爆裂老婆三歲夫》）﹑張致恆（《卧底賭神》）﹑高鈞賢（《新包青天》）…發展唔錯有聲有色，慢慢在內地市場找到出路。

當以為個個港星都係咁，就大錯特錯喇！近日熱播中的古裝大劇《獨孤天下》，無意間發現一張熟悉面孔，原來電視劇《真情》中飾演唐立生的盧慶輝竟然有份演出，可憐到只淪為茄喱啡，不過係有角色名的大茄囉，不禁令人覺得同人唔同命，為了在內地市場找到定位，真係可以去到好盡啊！

飾演北魏安西將軍楊忠的他，只是開場稍稍出現一下，作為劇情故事的開章，不過重心完全不在他身上，他只是當時時代一個得力人物而已，更只有13個字的對白：「聖上，卑職救駕來遲，望聖上恕罪。」而且正面樣只出現3個鏡頭，不超過20秒少得可憐。

曾幾何時貴為靚仔小生，唐立生醫生形象令人忘也忘不了，現在即使49歲依然保持良好狀態，更散發出成熟男人味道。近年慢慢復出的他，就好似去年在《賭城群英會 》飾演梁成謙一角，再次出現觀眾面前令人眼前一亮。而他更將事業放在內地，目前已經完成了兩部作品，《獨孤天下》就係其中一部更係他於內地拍的第一套古裝劇，作為打開內地市場的開始吧！

目前《獨孤天下》都播了12集，他只係在第一集出現過，就在其中一個劇情更描寫他生病而未能上京，由飾演他仔仔楊堅的張丹峰代父上京，從這一方面可知他好可能已經領了便當。其實，盧慶輝接下來更會推出唔少作品，就好似將會拍網劇《PTU機動部隊》﹑《劍王朝》，雖然唔係主要角色不過可以睇得出他多麼努力，相信想透過累積劇集，令電視友對他有印象。