鄭秀文讚唱歌「勁好聽」 糖妹耕耘8年好感動：對我幫助好大

俾自己偶像讚係咩滋味嘅呢？咁就要問糖妹(黃山怡)喇，事關鄭秀文(Sammi)喺IG話記得糖妹之前於TVB節目《流行經典50年》中唱過佢嘅〈如何掉眼淚〉，Sammi仲大讚糖妹唱得勁好聽！係「勁」好聽啊，Sammi用個「勁」字嚟讚糖妹，等於俾糖妹一個肯定。

糖妹接受我哋《香港01》訪問，佢話Sammi係自己嘅偶像，估唔到佢會公開讚自己：「前輩的鼓勵對後輩嚟講係好重要的，雖然我上完節目，都得到好多人嘅讚賞，但獲原唱者肯定，嗰種感覺完全唔一樣，對我幫助好大。」

其實糖妹出道8年，出道時一直被指酷似陳慧嫻，加上經常表演同埋翻唱陳慧嫻的經典歌曲，所以有「翻版陳慧嫻」之稱，再加上佢不時拍吓劇，做吓節目，很容易令人違忙她是歌手的身份，問到佢會唔會覺得自己懷才不遇，佢好謙虛咁話：「懷才不遇唔到我諗，我已經算好幸運。」

其實糖妹一直都無放棄音樂，縱使現在大眾已經好少聽廣東歌，即使可能大家記得佢演過嘅角色多過佢唱過嘅歌，其實佢每年都有Keep住出歌，例如〈在這家〉、〈十年青春〉、〈陽光小姐〉，佢都有參與填詞或作曲，而〈一起不一起〉則是林奕匡和林若寧分別為她作曲填詞，除咗出自己的歌，糖妹沒有停過其他音樂創作：「其實我跟糖兄都一直有參與幕後工作，例如電影配樂，大家未必見得到，我哋在各方面默默耕耘，希望有一日其中一個作品可以得到好多人嘅關注。」

入行多年，糖妹與許多歌手一樣默默耕耘，雖然已是公眾人物，出街無人不識，但佢沒有因此而鬆懈也沒有因此而自滿：「我唔係追求一夜成名，不會用無論好壞的方式去走紅，而是希望透過累積自己的經驗和作品去令人大眾欣賞自己。」糖妹透露即將推出新歌《實驗青春》，這首歌係由周國賢作曲，新晉填詞人楊熙填詞，期待這個組合的新作品。