開放式廚房不利女主人？　李居明叫地產商：唔好廳加個灶就當廚房

香港人人嘆上車愈來愈難，而地產商推出的細價樓又愈來愈納米，依家大部份新樓都無特別設廚房，美其名係開放式，實則似茶水位，一向投資有道的李居明，琴晚其新戲寶《美哉秦少游》於新光上演，與主演蓋鳴暉（Joyce）講起買樓，Joyce仲話貴到連佢都唔敢買，師傅大把物業唔使驚，不過佢就話睇唔過眼依家啲納米樓無廚房，佢話不利風水喎。

師傅話：「我哋風水師最反對屋企無廚房位，因為無廚房就等於無女主人，亦等於無老婆，或者女人住進去，都對佢不利，所以我呼籲地產唔好唔整廚房，唔好喺個廳求其加個灶就當廚房，希望地產商以後斷絕呢種風氣，因為對香港嘅女人不利！」

不過依家後生一代又真係好多「無飯家庭」，TVB節目《安樂窩》主持林穎彤（Bella）接受《香港01》訪問，佢都話唔鐘意開放式廚房：「因為我都鐘意煮嘢食，如果整開放式廚房就會成間屋都好大油煙。」不過其實Bella亦唔鐘意傳統嘅廚房，佢話依家同媽咪住，所以廚房係媽咪嘅主場，睇過無數樓盤嘅佢，一早已經諗好將來自己屋企嘅廚房點整：「我會用玻璃間隔劃開廚房，咁樣就唔會令屋企咁大油煙。」不過除咗減低油煙味之外， Bella就話唔知呢種「偽開放式」廚房於風水學上會唔會好啲。

其實於風水學角度，無廚房除咗對女主人不利，仲難以匯聚財氣，古語有云：「開門見灶，錢財多耗。」爐灶代表家中的財庫，開放式廚房會令爐灶於屋企中外露，就好似將錢箱長期展露人前，所以有損家宅嘅整體財運，即使本身的收入不錯，聚財能力也會減弱。所以Bella就算用玻璃間劃開廚房，但都會俾人見到個爐灶，於風水學上都係唔係咁好。

不過玄學始終不是精密科學，例牌都要講句：「信則有，不信則無」，各位看官請斟酌參考，本來樓價已經令一眾打工仔大嘆上樓難，辛苦上到車，有個完整廚房都唔係要求好高啫！