【絕世好女友】謝芷倫慳家又體貼 連潮州功夫菜「反沙芋」都識煮
「港女」一詞近年變成奄尖控制狂拜金嘅代名詞，但其實香港女仔一樣有好多可取之處。《愛．回家之開心速遞》中，Mandy林美香由當初嘅拜金女變成滿分女朋友。現實生活中謝芷倫都一樣貼地，她說：「如果結婚時無樓，真係可以住男家或女家，唔一定要搬出嚟。」簡直係絕世捱得好女友呀 !
場地提供：回味無窮印尼餐館
《愛．回家之開心速遞》中，Jan謝芷倫飾演大小姐嘅秘書Mandy林美香，由當初嘅拜金女變成絕世好女友，拒絕釣金龜識富二代，寧願陪男友街邊食腸粉。Jan就話現實生活中自己比較少食街邊嘢，快餐店坐低食開心啲，「M記早餐係我至愛，以前拍拖都成日食，最鍾意食薯餅。」
Jan仲話情人節千祈唔好出街食飯：「真係特別貴好『掠水』，寧願自己煮或者提早食飯慶祝，茶餐廳都無咩所謂，有心就得。」
除咗識得慳錢，Jan入得廚房出得廳堂，事關謝家有個廚藝高超嘅謝媽媽，可以從旁偷下師，「 新年細個有幫手整油角，有跟媽咪學整潮州反沙芋，真係超好味架。」連呢款功夫菜都識整，果然係好女友好媳婦代表！喺Jan心目中嘅最佳女友又應該係點？ 「我覺得應該係要知道對方經濟能力去到邊，包容對方俾到啲咩，唔好強求要求，有溝通相處舒服。」
【初三赤口】林淑敏狠評大小姐 「佢咪一個識打扮嘅老姑婆囉！」
有時拍拖拍得耐唔係話唔想結婚，不過現今世代年輕人都不禁嘆一句：「那有錢！」無錢買樓無得二人世界，令唔少愛侶面臨唔結就分嘅困境。有樓無樓又係咪結婚嘅重要指標呢？Jan就覺得：「 好現實嘅社會現象，真係無樓嘅可以住男家或女家，唔一定要搬出嚟。（唔怕有婆媳糾紛？）好多朋友都有分享過，通常推個男仔去講。比着係我都一定唔會直接同老爺奶奶講，如果小事忍咗佢啦，真係忍唔到就同另一半講。」聽落好有計劃咁，但Jan話無時間拍拖依家仲係單身，咁大個筍盤，男士們識做啦。