章子怡裸替邵小珊指控曾提供大麻　趙薇范冰冰發聲明譴責造謠

身處現今呢個資訊爆炸嘅年代，人人都可以發放消息，到底幾多係真幾多係假有時真係好難分得清，以訛傳訛之下，「聽聞」講講下都變「真相」，當事人要嚴正聲明斥責都係保護自己。一名曾經擔任章子怡裸體替身嘅內地演員邵小珊，18號晚忽然發微博大鬧范冰冰「毀我一生」，仲指訴趙薇「給過我大麻」，令人嘩然。

曾經喺馮小剛電影《夜宴》中，擔任章子怡裸體替身嘅內地演員邵小珊，18號晚連發多篇微博，指控趙薇曾於北京老三里屯提供大麻俾佢吸食，又話范冰冰曾在良子（足浴店）洗腳：「當着我的面一會兒趴馮小剛腿上，一會兒爬趴在王中磊胸上。」無幾耐邵小珊就將爆料微博刪除，改PO一張同范冰冰嘅合照留言話：「要不是你介紹我不會認識馮小剛王中磊，拍夜宴，毀了我一生！」

現今社會有圖都無真相，何況邵小珊嘅留言只得文字又無實證，加上呢幾篇留言出現前，邵小珊曾PO出自己嘅演藝歷程簡介及聯絡方法，大批網友都斥責佢想出位作故仔。就呢個莫名其妙嘅爆料指控，范冰冰趙薇嘅工作室先後發聲明譴責誹謗言論，並會依法追究法律責任。