【港女講感情】情人節係場攻防戰　袁詠儀收老公粉絲送花最有Face

昨日係一年一度嘅重要節日，重要過你年三十晚食團年飯，又或者年初一要去親戚屋企拜年，就係情人節！其實情人節性質同生日/聖誕節差唔多，都係好商業化咁食大餐同送禮物，但意義又有所不同，生日就個個都有，但個個都分佈喺全年嘅唔同日子，所以就冇咁覺眼你點樣過生日；而聖誕節就普天同慶，通常都會約成班朋友BBQ交換禮物，所以就算收到水杯、相架呢啲垃圾禮物，都可以影相打卡話畀大家知你有禮物收，而情人節呢就好唔同，因為一年就得呢一日，有冇花同禮物收好明顯。

【港女講感情】阿嬌鍾欣潼認愛賴弘國　有錢有樣邊使人「埋單」？

【港女講感情】平安谷女人嫁邊個冇得揀　現代就有男朋友都難結婚

所以2月14日又被命名為「情人節收花比賽」，辦公室入面嘅花生友就會默默留意到底邊位同事第一個收花，邊個同事收最多花，又或者邊個冇花收，大家嘅面子存亡關鍵，有人甚至會不惜買花送畀自己扮有花收。

總之呢一日就係一場攻防戰，各位女士會花盡手機，除咗花好多心機用美圖秀秀執靚自己之外，仲會諗好晒Facebook feed，IG Story，務求顯得自己最幸福、最Sweet，分分鐘個idea仲勁過Big4 廣告強人。

其他參賽者：

女士們忙住喺fb放閃固然係辛苦，但背後一眾男友嘅努力亦係功不可沒！一年咁多節日要諗禮物已經好頭痕，生日、紀念日、聖誕節、情人節，要唔重覆又要有心意，難度直逼公開試考文言文。

不過，最心酸嘅都係冇拖拍嘅單身狗，有得送禮物同收禮物都仲呻辛苦？可憐嘅係有錢都冇對象去送禮物，網上面見唔少一紥紥玫瑰花同公仔被人扔喺垃圾桶。單身狗情人節冇地方去，留喺屋企打下機玩下fb/ig，WTF，碌極都係放閃相，玫瑰花係基本配備，就好似去老麥叫個餐送嘅薯條咁；iPhoneX係常餐（相信iPhoneX喺情人節係突破銷量），唔想諗送咩又肯使啲錢懶人之選；而各款C字頭、P字頭、H字頭嘅手袋銀包就係誠意放血大作，相信你女友呢個月都會好溫柔體貼，真係睇到都眼冤，所以成日見一班毒友喺度詛咒：「願天下有情人都是失散多年的親兄妹，阿門」